المعارضون لمحاربة احتلال الملك العام !

فاش كنهضرو على احتلال الملك العام من طرف المقاهي و المگازات الكبار و الصغار و الفراشة، و تقاعس السلطات المنتخبة و المفروضة ليس في محاربتها بل لايجاد حل لهد الافة الشنعاء كتخرج واحد الطائفة كتقول خلليو الناس يتقضاو حاجة راهم عندهم اسر و مترتبة عليهم ديون، واش بغيتوهم يمشيو يگريسو؟؟؟؟
انت اسيدي، و انتي الاللا، أ المناهضين لتحرير الملك العام، راه مبغيناهمش ينضافو ن لائحة الشفارة، احنا معاكم و كنضمو صوتنا ل صوتكم ف بناء اسواق نموذجية لكل "فراش"، لكن بالنسبة للقهاوي و الحوانت خصك تخجل من معارضتك او حتى صمتك عن افعال هؤلاء.
اليوم مبقاش غير الرصيف هو المحتل، بل تجاوز الامر ذلك، و اصبح حتى الشارع مملوء بالسلع ها للي جايا من الشينوا ها للي جايا من سبتة اما د القريعة و درب غلف فحدث و لا حرج، و القهاوي مفرشين الطوابل و الكراسة على عينك ابن عدي و السلطات ف دار غفلون
بالنسبة ن الفراشة فعلا معندهومش راس المال صحيح و لهذا احتلو الارصفة و الشوارع، و من حقنا نضامنو معاهم و نطالبو السلطات بإيجاد حلول عاجلة، و لكن باش تجي مرسيديس 310 او سپرانتر للي سعرها يناهز 200 الف درهم او كونطير گوادا او كاميون ميتشي ويوقف ف الشارع الرئيسي و يفتح الباب و يبدا يبيع ف البطيخ الاصفر او الدلاح فهذا امر غير مقبول بتاتا.
كيفاش زعما السلطات بجميع اطيافها كيبقاو فيها هد الناس و ك تكابد الهم ليهم رغم انهم اقلية و تغمض العين عليهم وخا متيزگلو حتى حاجة ضداً ف مطالب الساكنة.