بغيت نعرف علاش ؟

علاش في الفقيه بن صالح عندنا اكبر فرشاة مائية وتنشربو الما فيه لحجر ومخلوض ؟ بغيت نعرف علاش ايلا فتحنا الروبيني في الدار التحتانية الماء ما تيطلعش للطبقة اللي فوقها؟ بغيت نعرف علاش ما عندناش مشكل، صابرين وراضين بالقسمة ،ونتسناو شي حد لي يدوي علينا.
بغيت نعرف علاش؟ علاش عندنا الفوسفاط في الفقيه بن صالح وتيستافد منو غير المجلس في المواسم اما الجمعيات ايلا بغات تنظم شي نشاط ما كاين لي يعتقها ولا يعطيها باش تتحرك؟ وعلاش الفوسفاط يخدموا فيه ناس من خارج المدينة واولاد لبلاد مليوحين في القهاوي والزناقي
بغيت نعرف علاش؟ عندنا الحق نستافدو غير من التلوث ديال معامل الحليب والخدمة حرام علينا.
بغيت نعرف علاش ؟ البلدية تتخلص من عند لقهاوي في ضريبة" لاطيراس" وتيعمروا للراجلين طريقهم وتيخليهم يمشيو وسط الشانطي وتيوقعوا حوادث سير كثيرة وخطيرة.
بغيت نعرف علاش؟ المسؤولين عارفين بلي حوادث السير كثيرة وأغلب الشوارع ما فيهاش التشوير ولبلايك.
بغيت نعرف علاش ؟ لي جاب شي ريال من الخاريج تيفتح قهوة حتى وصلات انه بين القهوة وقهوة كاينا قهوة ؟ وعلاش المسؤولين تيرخصو للقهاوي بهاد السرعة .