عن المقاطعة أتحدث كيفاش بدات وشنو هوما النتائج وشنو مطلوب منا كمغاربا

المقاطعة بدات 20 أبريل وهي جات كنتيجة لحراك الريف و جرادة و أشكال نظالية أخرى ترتب عليها بزاااف ديال الإعتقالات لي شكلات واحد الوعي عند الإنسان المغربي خلاتو يدرك اخيرا انه خاصو ولا بد يبدل الإستراتيجية باش يحصل على نتائج مغايرة ومن هنا جات الخطوة دالمقاطعة ..
سؤال : علاش بالضبط ثلاثة دالشركات
الجواب : هاد الثلاثة دالشركات بالضبط هوما المتحكمين فالسوق وهوما لي محتاكرين يعني بالعربية تاعرابت هوما اليد الخفية عند آدم سميت لي كيطلعو السوق فوق ما بغاو ويهرسو شكون مبغاو ويطلعو شكون مبغاو وهذا راجع للمزاوجة بين المال والسلطة أي أن مالين هاد لوزينات لي قررنا نقاطعو هم صناع القرار السياسي فالبلاد لي كيتدخلو باش المُشرِّع لي هوا بالعربية تاعرابت الميكانيك لي كيصايب القوانين فالمغرب اه داك لي دار قانون ديال زيرو ميكا كتخليه يدير قوانين فصالح هاد مالين الشكارات لي كتكون عندهوم سلطة كيأثرو بيها وبالتالي كيتعطالهوم الضو لخضر باش يدير مابغا وفي اطار القانون أي "سرقة مقننة " لجيوب الكادحين ، و المقاطعة ديال هادو بالضبط هوا باش نعاقبو صناع القرار السياسي اولا ونعطيو مهلة لباقي الشركات باش تخفض الثمن والا غادي تدخل فخانة المغضوب عليهم ، وبالنسبة للناس لي تيقولو انه لازمنا نقاطعو كولش فضربة وحدا كنقولهم هاد التجربة ديال العقاب الإقتصادي يالاه دخلت للمغرب وميمكنش نقاطعو كولش فخطرا داك الشي كيكون بالتدرج باش نخليو للناس البدائل ونساينوهم يتشبعو بالفكرة مزياااان تا ترجع عندهوم ثقافة عاد داك السعات أرا برع ..
شكون لي دعا لهاد المقاطعة
لي دعا لهاد المقاطعة هوما شباب قتلاتهوم البطالة والغلا و معندو ميدار و الوسيلة لي ستعملوها هيا كونيكسون مسروقة و لا خمسة دراهم طروا جي واخدينها كريدي ومبارطاجينها دراري دراس الدرب كاملين مع بعضهوم .
شنو النتيجة لي وصلنالها
اليوم وصلنا للنهار 13 فقط النتيجة هبوط حاد فأسهم هاد الشركات داك اللعيبات ديال مازي ومادكس دخلو للموقع دالبورصة وشوفو بعينكوم .. ايضا هبوط حاد فثروة مالين الشكارة المالكين لهاد الشي لي مقاطعينو دخلو شوفو بعينكوم مجلة فوربيكس شحال خسر مول البونبا فهاد طلطاش ريوم .. نتيجة اخرى كتبين ان الصهد وصلهوم هوا هاد الإعتذارات الآمقبولة لي خرجو بيها مالين الحليب دالكرطونة ولي مكتسوا والو اذا متحققش الملف المطلبي 2.50 للكرطونة . نقطة رجع للسطر باش نناقشو موضوع آخور
خوتي المغاربا هاد خليها تصدي فدار بوها وهاد نسبة العنوسة لي بديتو كتناقشو راكوم كتكرسو الصورة لي رسموهالكوم فمداولة و برامج قنوات الصرف الصحي لي كتصور اكبر عدو للرجل هو المرأة وأكبر عدو للمرأة هي الرجل بغاوكوم تبقاو بهاد الصورة النمطية وبالتالي الرجال يبقاو يقولو النسا مافيهم ثقة و النسا يقولو الرجال ما فيهم ثقة وبالتالي غادي نبقاو ندورو فداك الدوامة ، خوتي المغاربا تعلمو تناقشو الإنسان بعيد على الإنتماء البيولوجي ديالو مرا ولا راجل وتعلمو ان أكبر عدو للجنسين هوما هاد الشركات المفترسة ، لهذا نحاولو نساليو من هاد الموضوع لي طلقوهلنا ديال البايرات ونكملو على المقاطعة ديالنا وتحياتي ليكم اولاد الشعب #مقاطعوون