السعاية و داك شي اللامادي

ليوما بغيت نتكلم معكم على ظاهرة السعاية،أو كما كيبغو يسميوها التسول،نسبة الى سولت يعني سمحت ليه نفسوا يسعى،و علاش السعاية بالضبط،حيث السعاية ولت مهنة لمن لا مهنة له،فحل داك الهذرة لكتقال على الصحافة،لكن و الله ما يقدر أي واحد يعملها،خص تكون عندك الجبهة من لقزدير و لسان حلاوة فحل السويهلة،و تكون الهدرة عندك كع ما كتسلى فحل لخدام بحجر صوني،و لكذب و لمبررات ديما لجديد،الحاصول خصها تكون عندك شهادة ديال سعاية طبعلك فيها شعيبة.

و هاد ظاهرة اذن مزيان نتكلمو عليها خصوصا أننا كنعيشو فدولة كلشي فيها إستثنائي،خصوصا أن سعاية كع ما مربوطة بالفقر،بل مربوطة بثقافة و بتربية،تربيناها و تبنيناها فبلادنا،حتى صبحت تعتبر من الثروة اللامادية.

كفاش زعم هد شي لباغي نشوفو معاكم،خصوصا أن سعاية شي حاجة فبلادنا و لت كتخلق معانا،و قال كراه ثقافة ديال لبلاد بدينا نفتقدوها،عموا عموا شري ليا حلوى،و لطيفة و لطيفة شي قبضة ديال نعناع و الله ليوم ما مشيت لسوق،فاطمة افاطمة فاطمة شويا ديال خرقوم،و لا داك العايل صغير كدوق فلباب قالت ليك ماما عطيها شي خبرة كع ما عجنت ليوم،واحد نهار و أن عند واحد العائلة فلمدينة لقديمة كنطلل من شرجم و أنا كنسمع شي واحدة كتقول لبنتها لصغيرة زاهرة مشي لعند خالتك خدوج و قلها قالتلك يما عطيها شويا ديال لزيت،و هي ترد عليها زاهرة ماما زيت مازال عندنا فدار،و هي جاوبها قلتلك سير راه زيت لعندنا كع ما تكمل لينا الشهر و زايدون زيت غالية و خالتك خدوج كجيبها ليها رجلها رخصية من سبتة كعطيها ليه داك نصراني لخدام عندوا.

و لكفضي معايا نيشان هي داك سعاية او العادة او ثقافة فحل لكبغيو يسميوها الدراري ليوم نعدلوا شي طاجين و كبداو العيال من لحومة و هما كسعاو طاجين كطلع بيليكي،من لمطيشة لبصلة لخزوا،الخبز و الزيت حتى كوصلوا لحوت و كعملوا بانشي،سردين و كبالة و شران و زيد و زيد،بلحق لقضية ديال طاجين كع ما تكون فحل عاونو هد لفريق،و العايل من صغروا كطلع سعاي و ملي ككبر،و الله ما يخدم ليك كقبلها غير بسعاية و ها هو بخير.

و سعاية راها مهنة،واحد نهار و أنا غادي فطريق جبرت واحد لكارط ناسيولن طايحة فطريق فيها المهنة مياوم بين قوسين (متسول)،زعم سعاي و جاني لفضول بديتك نقرا فالإسم جبرتوا ولد لحومة راجل كبير عندوا دار 4 طبقات و 2 كرجات،و طنوبير حمقة بياسة قرطاسة هي نيت و كل ويكاند كبان فلحومة و لادوا فمدرسة ديال لفلوس و كقولك بابا تاجر،كخدم فسبانيا و كجي لعندنا السبت و لحد و هو كسافرلكازا كسعى مع كروا و كجمع لعاقة مع راسو.

ايوا مشي مشكل يكون عباد الله سعاية و هي دولة كاملة قايمة على سعاية من قطر و سعودية و الإمارات جات حتى نهد هاد لمساكن و وقفت زعم لا أويلي حنا غير بغينا نهدروا شويا اما هما الله يزيد و يبارك ليهم فرزقهم و رزاق وليداتهم.

الحاصول قالك ناس زمان ما دمت في المغرب فلا تستغرب ،حيث كلشي إستثنائي و كلشي ثروة لا مادية.