إرفَعْ رأسك أَبَّا راكْ عرايْشِي

قصيدة زجلية –مصطفى بوحديدة ( أبو يحي)


إرفَعْ رأسك أَبَّا راكْ عرايْشِي
سُوسِي ريفِي عرْبِي صحْراوِي
خويا ولْدْ يمَّا و بُويَا
ومنك منخافشي
هَزْ راسَكْ أَبَّا راك عرايشي
ولد لكسوسْ الحضَارَة..
تاريخكْ حقيقة مَاهِي كذبة أبريل
أو مُدَوِّنْ فالفَيْسْ بْغَى جِيمْ حْزَارَه
من بْدَايْتَكْ وَنْتَ يا بَّا
كيف مدينتَكْ جوهرة..
هذا حصْن الفتحْ
وحصْن النَّصْر عِبارة والنورس الحزين،
و الغالية المنارة..
صامدين و عاقلين على مائة غارة و غارة…
وهذا فم السبعْ لي ما عمرو تْخَبَّعْ إذا زأَرْ !!!!!
ِريحتْ البارود مزال من فمُّو تَطْلعْ !!
مْخلْطَة بدمْ الخاينين العهد و الغدارة
العرايش يا جنة من تفاحْ ونُوَارَا
مزال فيك الرْجال يقاوْمُو مول الشْكَارة
هزْ راسَك أَبَّا راك عرايشي، والعرايشية ماشي حكارة
يمكن نْعلِّيوْ الصُّوتْ ونْخرْجُو لِي فْقْلُوبنَا مكْبوثْ
حتى يحْسَابْ ليك حنا عطّارا…؟!
لا آسِّي المسْؤول !! العرايْشي مَاهُو عطَّارْ أو مهْبولْ
العرايشي مَاهُو ذاك المسْطول العرايشي عارف آشْ تايْقول
كيف ما عرفكم لخيرنا، عصَّارَه…
العرايش يا جنة من تفاح ونوارة
يمكن اليوم تبهدلتي ومن بين يدِّينا ضعتي
وضاع معاك الجد، و مشات معاك القْصَارَه…
ماكِينْ باسْ كيف ما قلتْ حنا ولادْ الناسْ ندعو الله يحد الباسْ
ويرجع التنِّينْ يحرس التُّفاح، والسْبع المسْروق يرْجع لَعْرِينُ
و تْسَالَ هذا المجْزَرَة بغينا غير التغيير والقُبَّة يدْخُلْها أميرْ
يكون عندو ضمير ينَظَّفْ الكْرَاسي من عنكبوث سْمَانتْ من دمْ الفقرا