التْرُومّايْ

إلى حسن نجمي
كِ فاقْ ...
وقبَلْ ما يشْربْ كَاسُو دْ اتَايْ
التْْرُومّايِْ
دَوّشْ
مْشَطْ شَعْرُو... وْفََرّشْ
زُوجْ قُضبانْ دْ الحْديدْ
قالْ
يْسافَرْ بْعيدْ،
وَجّدْ... الشّنطَهْ
دِيوَان شِعر، ومَانطَهْ
وسَروالْ دْ الدْجينْ،
وبْحالْ يْلا مَهزُوزْ على زُوجْ دْ اليَدّينْ
نْوىَ
فْ كْفُوفْ الّريحْ ... يَتْخلْوىَ
ويْصَلّي،
حْلفْ هُو لا يْولّي،
وكُل خَطوة يْمشِيهَا
يَرجَعْ مَن بَعدْ ... يَمْحِيهَا،
فْ طريقُو ... وَشْوَش للظّلْ
وفْ كتابْ المَايا والرْملْ
زمّمْ ... شِي كْلامْ
توَضّا وعَامْ
فْ راسْ المُونْ
قالْ يوْصَلْ... لقاعْ الكوُنْ
وغابْ
فتََحْ بِيبانْ فْ الضْبابْ،
كانْ،
باغي الرّحلة تْطُولْ
كانْ،
فْ شونُو، دِيمَا، يْقولْ :
« بْعيدة
المَحَطّة... اللّي فْ البَالْ
وقْريبْ
شارع فْرنسا
!!قريبة مَحَطّة أكْدالْ»
سلا، في 25 مارس 2012