نصوص

بالسلامة ياراسي
لساني عكل
مابقى لي كلام
مابقى لي خيال
يزوَّق صورة لك
زاو?ت في القلم
حزَّرت الدواية
وجَّدت الغلاف
ما لقيت بْرا
خفت نكون فايق
والحلمة تَّحرق
ورمادها ما يكون مداد
المداد اللي ما فيه دم ،
حروفو ممحية .
........
........
شفتك في المنام بسمة
تطلق لي اللسان
غنيت ... شعرت .. وبحت .
ضَرْبَتْ الرعدة.. فقتْ ..
فقت فيك .... ما فقت منَّك...
ما ولِّيت.....ثمة بقيت .
بسميات
1
الكلام معكَّس
وخَّ عرِّينا الورقة قبالتو
ما بغاش يخرج
2
تخبَّى الكلام في سحابة
دْفات الورقة
وهو يصب ... فيها
3
محيت شي كليمات
لقيتهم ملثمات
.... في الورقة اللخرى
4
الكاس ما فهمش:
هو مذكر ( وقيلَ)
القرعة مؤنث ( وقيل )
وكيفاش ،
هي اللي كتكب فيه ؟
5
ما فيها باس تَعْصايْ مولاك
مرّة مرة...
تزوْلي الحجاب
وتخرجي قصيدة عريانة .
6
كنت نرعى الما
المزاج جاه الزلزال
والضيم خيَّم
خبيتو عندي في لامان
لما غلبني همي اكثر
خرج دمعات بجناوحها
وانا نضحك .
7
الحلمة دار لها الله جناوح
وتفكَّات مني
8
دفعت ظلي جهة ظلها
وهو يطير الطشاش .
9
الكرسي حار
الفوق لحية
ومنين جا دم الحيض ؟
واش الرئيس كتجيه حق الشهر؟
10
ماسمعتك
ما قرايتك
ماشفتك
خفت نكون سكرت بعشقك
وتلَّفت راسي وتلَّفتك .
مقبرة الكلام
مشيت لمقبرة الكلام نترحَّم
قريت شاهد شاهد :
قصيدة خسرت في كرش الورقة،
قصيدة طلع فيها الدم ،
قصيدة ماتت على غفلة ،
وحدة غزاها السكر ،
وحدة كانت مبليَّة ،
ووحدة قتلتها الفقصة .
.........
.........
واو .. واااااو،
وشحال كنت ربِّيت د الموت ؟
يجيك
ماتخافيش ...
نجيبو ... نجيبو لك ،
غير بالمهل،
يجيييك .. يجيك
يفيض وسطك
يتَّغرس .. ينوض
فيك الكلام ،
يا الورقة ما تخافيش .