"المصباح"، عام 2050

د. مراد علمي
أستاذ جامعي، كاتب ومترجم

كان المصباح فى اللول غير صغير، كوتكوت كايلعب فى حجر أمّو أو ما كايخروجش من الدّرب، كايخاف لا إضربوه الدراري لوخرين اللي كانوا كايكرهوه، لأنه كان مغرور أو كايقول ألكول واحد بغى يسمع ولا ّ لا، أنا اللي جبت ليكم النور، الضّو، باش ما إتهموهش الناس باللي بغى ليهم فى الأصل الظلام.

كانت أمّو، نسمّيوْها "المصباحية" ما كاتخلّي ما تنفخ، تمجّد فيه قودّام لعيالات لوخرين فى الحمّامات، عند الكوافورات أو الصالونات، عرفتوا ولدي: هو اللي بوحدو ما عمّرو، توسّط، ستغل النفوذ، وظّف بنتو، سرق ولا فنيدة وحدة، يديه نظيفة، صافية بحال الحليب، أمّا الصلاة، ترتيل القرآن أو الزكاة ما كاينش بحالو، القاميجّة التّالية اللي لابس فوق ظهرو كايعطيها ألمسكين، أو كايفضل يبقى هو بالجوع ولا إشوف أخّوتو كايموتوا هاكداك، أو عنداكم إيلا شفتو ديك الكرش، أتظنّوا راها شبعانة خبز، دجاج محمّر، بولفاف، كفتة مشوية، سكسو بالزبيب، بائيليا، بسطيلة، جبن، تفاح، بانان، أناناس، أفوكادو، لا! الطّانسيون اللي نافخو، الحُرقة على الشعب أو مشاكلو سبابو، على الأساتذة المتدربين، النقابات، طلبة الطب، المحرومين، المسحوقين أو على اللي كاينتاحروا كولا ّ يوم.

أو حتى إيلا بكى، عنداكم أتّحسابكم إيلا سمع القرطسة اللولة غادي يهرب، يبكي أو يبغي يمشي عند ماماه، لا! هادي هي الشجاعة أو أم الشجاعة، العسكري ديال المعقول هو اللي كايعرف يبكي أو كايراوغ العدو باش إطعنو من اللّور، علاه ما عمّركم سمعتوا ضربني أو بكى، سبقني أو شكى؟ أو علاش ما يبكيش على شعب شبعان اللي بكثرة الرفاهية، التخمة كايرفض ياكول الشّوى كولا ّ نهار ولا ّ إسافر ألّخارج باش يبقى مكبوت فى دارو أو إتّتها بالعدمية؟

"المصباحية" كانت ديما مخاصمة مع "العمّارية"، لأنه بغات أدرّق عليها الشمش، ما كاين غير المعيور أو قلّة الحيى: ويلك آ المسخوطة، الموسّخة، شحال هاي ما كونتي غير كاتضوري فى الدّروبى أو الزناقي، هاربة من القانون، الشّاليمو أو اللقاط لا إسّلك ليك ديك اللسان الطويل، الظفار، ما مشات حتى ردّات عليها العمّارية: إشويني، إقليني فيك يا المغرورة، ردّاتها زعما زيت، كاتجمعي الملاين ديال الناس غير باش توهمينا بأن الشعب كولّو كايبغيك، ولو كايجيوْا غير صحاباتك أو اللي فرقّتي عليهم الزيت أو السكر، حتى هيتلر، موسوليني، سطالين كانوا كايحماقوا على هاد التجمعات، الخطبات باش إثيروا الدهشة، الإعجاب، إبهروا البسطاء، الطيبين باش إكشّطوهم حسن من بعد من جميع حقوقهم، حرياتهم الفردية.

المصباح، بدا فى اللول غير بالشوية أو كول ّ خطوة دار إلا ّ أو عمل ليها آلف حساب، يلا ّه كايضوّي غير على راسو أو على اللي معاه فى طريقو، لأن المعلم ديالو كان مراقبو مزيييييييان، متبّع الكبيرة أو الصغيرة باش ما يتّحرقش ولا ّ إنوّض العافية، لأنه اللي كايلعب بالعافية، تكون حتى تحت الرّماد، خصّو يعرف إتّعامل معاها، إلا ّ أو كلاتو، فحّماتو.

المهم، بدا كايخدم، فى الظل أو فى العلانية حتى توغل فى المجتمع، فى مفاصل الدولة، ربّى العضلات، بدا كايفتلهوم أو كايمشي كولا ّ نهار يتريني فى لاصال حتى رجع قدّو قدّ الغول، ديك الساعة بدا كايفرض على جميع المغاربة يشريوْا مصابح عند المصابحية، اللي كبروا معاه فى الدرب، أو كول واحد تجرّء ما يشريش مصباح، لاحوه فى الحبس، البير أو رماوْا من فوقو اللفع تونّسو.

فى هاد الوقت رجعات الموسيقى محرّمة، العراسات مهجورين، لأن جميع المغنيات أو المغنيين إمّا هربوا ألّخارج ولا ّ دخّلوهم ألّحبس، المكتبة الوطنية ردّوها جامع أو حرقوا جميع الكتوبة نهار الجمعة مورى صلاة الظهور، يعني الجمعة الكحلة، القهاوي تسدّوا، لأن النميمة ما فيها فضل، الكارّو عوّضوه بالتسابيح أو البسملة، الشراب بالطبع ممنوع، لأنه دين آخور، ضروري يتّعتبر شرك بالله، العلوم الدقيقة غير خزبيعلات غربية، ما عندها لاش تليق، الفلسفة؟ ما تكون غير خرجات من رحم الشيطان ولا ّ مراتو، الشّويطينة.

أمّا المغرب، غير ما تهضرش عليه، رجع يلا ّه مصحاف واحد، يعني المغاربة ما عمّرهم كانوا مسلمين فى أغلبيتهم أو شحال هادي أو هوما كايتسنّاوْا بالريق الناشف غير اللي إلقّنهم "الإسلام الصحيح"، بحال إيلا هاد الوقت كولّو كونّا عايشين بْلا دين لا ملّة، الجوامع، الأئمة، صلاوات التراويح، وزارة الأوقاف، القرويين، دار الحديث الحسنية، هاد شي كولّو كان غير وهم، سراب على سراب.

أمّا السينما، المسرح دبحوهم بسكين حافية، مهرجان مراكش للسنيما تحول أللقاء عالمي ديال "علماء الإسلام"، يعني ديال الإخوان اللي كايشرفوا عليه حفاد القرداوي، الغنبوشي، الحمقاوي أو النصرة، اللغات الأجنبية ما عندها باش تفيد، اللي معاه الله أو الرسول، ما محتاج لا الخارج، لا عقلاء الداخل لا أي نصيحة فى وجه الله، أو كول واحد عاش فوق هاد الأرض ضروري إكون عندو مصباح فى نهار الشدة، فى يوم القيامة، باش عل ّ الأقل إشوف فاين كايحطّ رجليه، واش على "الصراط المستقيم" ولا ّ على حافة "نار جهنم وفيها خالدون".

واش اللي ديما ما كايخلّيكش تنعس فى راحتك، كايخلعك بالعافية، الجنون، الغول و "مشتقاتهم" غادي تبغيه؟ لا! إلا ّ مساكن السخيين، صحاب القلوبة الطاهرة أو اللي طلبتي منهم، ما خسّروش ليك الخاطر: جاتك، أو شنو خاسر أنا؟ ياك كولّشي غير هضرة، كلام.

المهم المصابحية هوما اللي رجعات عندهم الكلمة، الصولة أو المهرجان، اللي قالوها هي اللي كاينة، إيلا شفتي مغربي واحد، بحال إيلا شفتيهم كولّهم، 50 مليون، كولّهم مربّيين اللّحي، عندهم علامة كحلة على شكل 10 الدراهم على جبتهم باش ما إتلفوش إيلا قدّر الله أومشاوْا ألمناسك الحج، لابسين طرابش حُمر أو جلالب بويض ضد العين أو مكر الشوّفات، إيلا سمعتي واحد منهم، ما كاين لاش تناقش واحد آخور، لأنه كايعرف يحفظ، يعرض، قاري درسو، أو ما محتاج لا موخ، لا تلقيح جديد ضد حمة الفكر أو النقد الذاتي، المهم المغرب صوت واحد، كايهتف النهار أو ما طال: الله أكبر، الله أكبر، فى الليل، النهار، على نعمة هاد الدّار، أدّاها المصباح، أدّاها، بالديمقراطية معاها.