الميزان وصروفو والعيد وخروفو

آه من محاين الأيام
والزمان ومصروفو
آه من تعب لوقات
والفقر وياليعت خوفو
كانت أيام عيد الأضحى
والخبز الخامر يدوز لطرحة
وبخروف العيد تكمل الفرحة
وأنا بفراشتي نبيع ونشري
ومن زنقة لزنقة نجري
مع المخازنيا والمقدم وذاك المخلي
البيع وشرى ف أيام العيد وجيبة
بين البايع والشاري سلعتو حبيبة
عوال على سلعتي
بها نصور رزقي
من زنقة لزنقة نجري
مع المخازنيا والمقدم وذاك المخلي
شواية وقطبان
وعلف للخرفان
نعبرو بالميزان
***
بقات للعيد أربع أيام
وأنا مع محاين الليام
والزمان ومصروفو
كرموني المخازنيا
كرموني فلي نكساب ولي ليا
خدو مني الفراشة
والميزان وصروفو
شي ف دار القايد
شي ف دار الباشة
يا لطف الله الخافي
ينجينا من يوم العيد والخبز الحافي
أنت قادر تعوض وتنصف وتكافي
أنت مولانا والعبادك ما تحافي
***
أيام العيد ولعواشر
لما تقدم لا تباشر
ما بقي مجمر ما بقى فاخر
ما للقطيب وزنان
ما بقى يطلع منهم دخان
مشى الميزان وصروفو
ومشات الفراشة.
شي ف دار القايد
شي ف دار الباشة
هادوك الي تبعو الرشوة والكاميلة
هادوك لا أصل لا مفصل لا فاميلة
هادوك الي غرقوا لبلاد السفينة
ما ينعسو نعسة زينة
حيث في كروشهم العجينة
الله من تعالى تعافينا
راها فيهم ماشي فينا
عوال على سلعتي
بها نصور رزقي
ومن زنقة لزنقة نجري
شواية وقطبان
وعلف للخرفان
نعبرو بالميزان
صباح العيد
لمن نحكي
لمن نعيد
خروف العيد
أصبح بعيد
مشات الفراشة
والميزان وصرفو
وصباح العيد
صبحنا نشوفو
صبحو قرون الخروف
صبحو فراسي يطوفو؟