شمس الحقيقة

وَاتْصَاااااااانَّتْ!
والرَايْس!
نْعَامَاس.. أنا ماشي رَايْس.. أنا هاوي..
لاَحْنَا ماشي في الكرة.. احْنَا في الصيادا.. والرايس كيقولوها للبحارة، وقيلا الكرة دات ليك العقل..
والله ما كْذْبْتي، حِيتْ من قُولْتِلي والرايس، يْسَحَابْ ليك أنا هو الرايس الجديد دْلاَيْصيص..
يا سيدي، أشْبيني وبين لا يصيص، راها مْشَات في عْزّْها وخْلينا فالبحر ورْيَّاسو..
ورَاه حتى الكرة فيها رِيَّاسها أمولاي، بحال البحر بحال الكرة
واش كَطْنْز عليا، البحر فيه الجوهر، والكرة فيها غي المرض والسكر وبَّاك صاحبي والتملاق والتنوعير والتخلويض.
وراه حتى البحر تَايْدِي بنادم في المركب ديالو، والصياد وقصْبتو...
- هذاك راه كيتسمَّا المكتاب أسِّي..
إيوا والمكتاب فالكرة، أشْنُو كاتسميه؟
المكتاب في الكرة، هو تْعْمل صابونا لْعْدُوك وَاخّا راه صَاحْبْك كْلاَ وشرك معاك، وخَلِّينا من مكتاب التهراس دْ اللعاب في التيران..
وزْعْما الصياد حتَّى هو عندو المْكتابْ.؟
مكتابو في قصبتو يْلا كان الحوت شْدْ في الصَّنارة، ومكتابو حتَّى ولو كانت عندو الطّْعمة والديسير والله لا صَيّْد.
وفالكرة، أشكَا يْصْيدو؟
بنادم التَّابعة حتى ولو كان قَاري بْزَّاف منهم، راه ماكيبغيوش اللي حْْسْنْ منهم، وما بغيوش شي سْمِيَا دْ البْلاَدْ..
ياكْ سيدنا الله ينصْرُو قال في الرسالة الملكية، خْصّْنَا نحتارفو فكولشي، ونْبْعدو المحسوبين.. و.. و...
شْوِيا بْشْوِيا، واش خصّْنَا نْحْيدو الضرسة بْزْرْبة، راه خْصّْها ليبرة والبنج، وخَصّْ اللحم يْبَرَا بْلاَ نتيبْيوتيك، وعاد أراك لْغْنَا والخْدْمَا.
أَخُويَا، هدشي ما عندنا فالصّْيَادا، عندنا الله، وكاندعيو الله باش يرزقنا بالدّْرعي الكبير والشّْرغو الغليظ، ونْصَوْروا رزقنا..
ياك قولتي أنت هاوي؟
ومالْ الهاوي ما صَيّْدش الحوت الكبير، وشكون قَاليك أنا كنبيعْ الحوت، أنا كنْصَيّْد للنزاهة والفراجة ونْسَا هَمّْ الدنيا.
وراه حتى الجمهور، كيْنسَا هَمّْ الدنيا بالفرقة والكرة..
يْلاَ كانت نظيفة بحال البارصا والريال، ويْلاَ قولتي الكرة فْسَلاَ هي دعاوي البْلاَ.
هاك شعل شي كارو..
هذا هو البْلاَ بعينيه.. وقيلا سافطوك لي شي بعضين باش تعرف أشنو فراسي، وسيرْ قوليهم راه الدستور جاب الفصل 26، ويْلاَ بغيتي التنفيحا الحارة، هَاكْ خُودْها، وسْطَّرْها بشوِيَّا وتْنْغَّمْ وعْطَس كيفْما بغيتي، وقولي كيف جَاكْ الإحتراف ديال التنفيحة باش تْعْرف تْهْدَرْ.
الله يرحْم بّاك، زيدْ شيسطْر باش نْعَرَف نهدَرْ معاهم..
وشكون هما؟
السْلاَويين..
ما لهم؟
راه بْدْلُو الرئيس وجابو الرايس..
ما فْرَاسِيشْ، وما تقولش السلاويين كُلْهم، راه فيهم وفيهم، واللي كَانْعرف الرايس رجل مْزْيان، ولكن عْلاَش حَيْدو الصبيحي من اللائحة.
وكاتْقُولب عْلِيَا، عندك الفيلم، وكَاتْبُوحْطْ..
داخْلَنا عليك بالله، واش الصبيحي دارو لو صابونا؟
لا سيدي، السّي الرايس طْلَعْ بالقانون، ويْستاحَقْ..
ومالك كدافع عليه والراجل باقي ما بْدَا.. وقول بعدا الله يْبَارْك، أنا ماشي ضدو، أنا معاه يْلاَ كان سبع..
إيّه نْسِيت، هو راجل مزيان يْلاَ عْرَف كيف يْمْسح التيران.. ولكن بْقَا فيا الصبيحي بْزَّاف..
ها هو معاك؟
شكون هو؟
الحوت كا يْضرب في الخيط
والله حتى نْتَا رَايْس.. ودَرْعِي كبير هذا، تْعَارف تْجْبْدُو..
عْومُو، وسْخْفوا، وطْلْقوا الخِيطْ، عَادْ قُول جْبْدُوا.. هَا هُو مْشا.. وِيلي على عِينْ..
العياد بالله، جَابْ لي خْبَار بْحال وجهو، وزادها رماني بالعين ومشالي درعي ديال ثلاثا كيلو.