حوار ساخر مع فؤاد علي الهمة

فى حوار ساخر مع فؤاد علي الهمة: انا طباخ سياسي وللي قال العصيدة باردة يدير لسانه فيها
فى هذا الركن الجديد ((حوارات ساخرة)) سنجري حوارات افتراضية مع سياسيين ومثقفين مغاربة لمحاولة استكشاف ما جد من الاسئلة الراهنة وطرح الاسئلة المشاكسة في محاولة للحصول على اجوبة تهم واقعنا المغربي
فى احدي ملاعب الغولف الراقية بالعاصمة الرباط وجدته منهمكا في تسديد كرة الى احدي الحفر الموزعة على العشب الاخضر..وسط تصفيق مجموعة من رفاقه فى حركة لكل الديموقراطيين وهم يهتفون :وجابها فالحفرة والله الى جابهااستأذنته فى اجراء دردشة قصيرة معه فقبل على مضض بعد ان نادى علي رفيقه بن عدي الذي جاء مهرولا لاكمال طرح الغولف....
- سي فؤاد رايناك لزمت الصمت في الشهور الاخيرة ياكما كاين شي مشكل؟
لا ابدا انا دابا كانوجد القوام والتبازر ديال الطبخة السياسية للي غادي ياكلوها المغربة فالصيف الجاي وكانقوليهوم مسبقا بصحة والراحة وشهية طيبة
- ولكن يا سي فؤاد انت في حركة لكل الديمكراطيين تقول بان الانتخابات غادي تدوز فالشفافية والنزاهة؟
معلوم علاه شكون للي قال العكس هادشي مافيه الشك ولكن لابد من المناورة راه الوقت تبدلات ومشا الزمان ديال با دريس للي كان كايطبخ بالعياقة احنا غادي نخدمو السماوي الله يداوي باش القوالب تطلع مع الشعب بلا مايعيق..
- اين هو الجرار او التراكتور ديالك؟
راك ضحكتيني التراكتور اسيدي اخذاه الشاوش ديالي صلاح الوديع عن الميكانيسيان غير واحد الرويضة تبوشات ليه ..وزايدون الحقل السياسي ولا رطب بالشتا وغادي يكون الحرث ساهل هذا العام...
- لماذا نجحت في منطقة الرحامنة وسقطت لائحتك بمراكش؟
نجحت في بن جرير لانها المدينة ديالي وارض جدودي اما في مراكش هذا ماكا نسميه فشل هذي غير واحد البينالتي نيشتها على مرمى خصومي فالعدالة والتنمية باش يسدوا دلقوشهم.
- استاذك في القوالب ادريس البصري قال بان اسمك الحمة وليس الهمة ماهو رأيك؟
بحال الحمة بحال الهمة غير بصراحة عندو الحق وشكون للي ماكاتضربوا القرينة علي اللحم خصوصا وان السمية كانت فسنوات الهيف او الحيف..
- لماذا جذبت عندك مناضل زمانه صلاح الوديع؟
ما جريتوش هو للي جا برجليه وانا للي اقتارحتو للمنصب للي كايتنغم فيه دابا والرصيد النضالي ديالو نستغله وخا مابقا فيه والو ودابا راه خدام كيفرق الميساجات عل اليساريين وكيسيري السبابط دياولي مرة مرة .
- وكيف هي علاقتك مع الشخصيات السياسية المغربية؟
كايجاملوني وكيغمزوا لي غمزات فيها الف معنى وعلى كل حال كل واحد غادي ياكل حقه من الحلوى؟
- هل ممكن للسيد فؤاد علي الهمة ان يعلق بايجاز علي هذه الاسماء؟
*الراحل ادريس البصري
معلمي واستاذي الله يرحمها روح
*محمد اليازغي:
تاجر كبير كايبيع كل شيئ
*عبد الالاه بن كيران:
صديق قديم وبراح ديالنا
*اسماعيل العلوي:
ذاك العود من ذيك الدفلى الحارة
*عبد الواحد الراضي:
وهل يخفي ابن المخزن
*هشام الكروج:
نجم رياضي عالمي غبي فى السياسة
شكرت السيد فؤاد علي الدردشة وقبل ان اغادر ملعب الغولف اخرج فؤاد الة الكنبري الشعبية واخذ يدندن عيطة من العيوط المعتقة:
فين ايامك يا بن جرير
غير الحجر والكور يطير
للي تهرس هالكرارس وللي تفرما يبقي تما..
بقلم :