بوغطاط المغربي: بداية سقوط الزريبة ديال علي المرابط وفوبيا الحموشي

تحية بوغطاطية للجميع،
سمحولي بزاف غبرت عليكم شوية وماشي من عادتي نديرها، خصوصا وأن الأيام القليلة لي فاتت كان فيها شلا حوايج لي كان عندي شلا مايتقال فيها. غير وكان فاش كنغبر، راه ماكنغبرش غير هاكاك، ولكن لأنني كنكون كنوجد ليكم مفاجآت من داكشي الرفيع غادي نعلن عليها شوية بشوية وداااائما الجديد، مااااشي الهضرة الخاوية أو داكشي ديال قنبول عاشورا ديال ولاد الكاطريام ورباعة النصابة والبانضية والفاشلين.
ولأن هاد الرباعة ديال الفاشلين والخونة جامعاهم حاجة وحدة وهي الحقد على وطن إسمه المغرب، ف نهار كتوقع شي حاجة زوينة ولا خايبة كتلقاهم خارجين فدقة وحدة ينبحو. باش يشككو فالحاجة الزوينة وينفخو فالخايبة باش يشمتو. غير وكان الخصوصية لي عند هاد الرباعة وهي أنهم مشاركين فمرض واحد... وهو الفووووبيا من واحد السيد سميتو عبد اللطيف حموشي.
ولكن قبل ما نهضر على هاد المرض وعلى لي مراضين بيه، لابد ما نذكر بواحد النقطة مهمة.
إذا بغيتي الناس يفقدو الثقة فالدولة ديالهم، ما عليك غير تضرب أمنها واستقرارها. إما بعمليات تخريبية على أرض الميدان أو بالإشاعة والفتنة... والفتنة أشد من القتل.
إذا قدرتي تخلي الناس تفقد بصح الثقة فلي حاميينهم (مؤسسات ومسؤولين)، آنذاك غتكون حققتي أول وأهم هدف كمدخل لإشاعة الفوضى فديك لبلاد وتخلي الناس تثور فوجه ديك الدولة ونتا بعيييد فبلاصتك... كتخليها حتى كتشعل مززززيااان عاد كتجي تتدخل باسم الديمقراطية وحقوق الإنسان وتبدا تلعب فيها كيف بغيتي.
الهجمات الإعلامية لي تعرضات ليها المؤسسات الأمنية وتحديدا المخابرات المغربية فالسنوات الأخيرة، ومازال كتتعرض ليها إلى يومنا هذا، ما يمكنش يختلف شي حد على أنها مدبرة من طرف جهات عندها حسابات انتقامية مع هاد المؤسسات المغربية وحالفة طيحها وطيح المسؤولين لي كيترأسوها باشما كان، واخا يعرفو يستاعنو بولاد الكاطريام وبالرباعة ديال البانضية والنصابة وبصحفيين فاشلين، المهم هو يشوهو الصورة ديال دوك المؤسسات والمسؤولين دياولها، باش المغاربة يفقدو فيهم الثقة.
خصوصا وأن هاد المسؤولين نجحو وتفوقو فخدمتهم لأزيد من 17 سنة متواصلة، وتمكنو أنهم يحميو البلاد من هجمات وعمليات خطيرة وقدرو يسجلو أهداف قاتلة ضد العديان، هادشي بلاااا مانهضرو على تفوقهم على أجهزة أجنبية فوق تراب بلاهم وهاد القضية بالذات مامسروطاش لهاد الجهات.
وطبعا ما محتاجينش نذكرو بالقضية ديال بيغاسوس لي كانت وحدة من دوك حملات البروباغندا لي دبرتها الجهات المعلومة، ولي ولات مفروشة للعادي والبادي. وكااااع الحملات لي كتستهدف المخابرات المغربية ومختلف المؤسسات الأمنية، سواء لي فاتت أو لي جاية مازال، كلها مقبولة فإطار الصراع بين الأجهزة والدول.
ولكن لي كيجيب حاشاكم التقية هو يكونو واحد الرباعة من نفس لبلاد هما لي كاريين حنكهم لداك البراني باش يعاونهم على ديك الخدمة... ومع ذلك فاللخر كتقول... لي عطى... ديك أسمو عليه... لهلا يفكو. ولكن المصيبة والطامة الكبرى هي تكون كتلاح بلا سليب وكاري حنكك فاااابور على أمل تحقق مصالح شخصية أو انتقامية لاااا علاقة لها لا بشي نضال ولا بشي معارضة، وترجع من راسك سلعة رخيصة و périmé كاع، يخدمو بيها شي ناس مكفسة عليهم من هوك.
وهادشي لي كينطبق على ديك الرباعة لي مريضة بفوبيا الحموشي... وفي مقدمتهم ولد الكاطريام النصاب الهارب من العدالة الفرنسية، زكرياء مومني، لي من نهار دار قناة على اليوتيوب فدجنبر 2020 ما عندوش شي موضوع آخر من غير الحموشي. ودار إلى حدود كتابة هاد المقال 141 فيديو، ماكاينش فيهم فيديو واااحد لي ما هضرش فيه على الحموشي.
وكاين "الإرهابي" المعنف والمقموع من طرف زوجته الأجنبية محمد حاجب، اللاجئ مؤخرا بين بالكون المنزل والسيارة. ولي دار 241 فيديو على القناة ديالو فيوتيوب من نهار بدا النشاط ديالو فنونبر 2017... وحتى هو ما كاينش فيهم فيديو واحد لي ما هضرش فيه على الحموشي. وطبعا بلا ما نحسبو التدوينات في فيسبوك وتويتر.
وعندنا كذلك سيد الشمايت والخوافة، لي معندو لا الشجاعة ولا الجرأة ولا فيه حس الرجلة باش يبان بوجهو ولا بسميتو الحقيقية... المدعو صلاح الدين بلبكري الملقب ب "فسحة"، لي محطم الرقم القياسي فعدد الفيديوهات على قناته فيوتيوب لي وصلات ل 1077 فيديو... وطبعا الحموشي هو الموضوع الرئيسي عند هاد الشماتة.
وكاين طبعا كوبل البانضية والنصابة... الكوبل فيلالي لي مساكن عاد التحقو بالرباعة وما وصلو حتى يسخنو بلاصتهم لقاو راسهم فخبر كان. وبااااركا غير لي فيهم يكفيهم مكاين لاش نزيد نحك ليهم على الضبرة. حيت راهم غارقين حتى لوذنيهم وقريبا غادي نفرشوهوم.
أنا خايف عليهم من الصدمة إيلا فكرات قناة i24News لي قالك رفعو عليها دعوى قضائية ففرنسا، ولي حلات المكتب ديالها فالمغرب، إيلا فكرات هاد القناة دير عليهم شي روبورتاج واعر بالدارجة المغربية من قلب الحي الشعبي لي تولدات فيه دوميا أو من قلب lycée لي قرا فيه عديدينة هههههه
ولكن كيبقى زعيم هاد الرباعة أو بالأحرى هاد الزريبة هو أكثر واحد مريض بهاد الفوبيا وهو الصوحافي الفاشل وعميل الجزائر علي لمرابط، لي عدد الهاشتاغات على DST أو الحموشي لي كتبها فتويتر أكبر بكثييييير من مجموع الفيديوهات لي داروها الفلالس ديالو كاملين.
هاد الرباعة من كثرة ما عياو ما يطلعو وينزلو باش يشوهو صورة المدير العام ديال DGST و الأمن الوطني، وفاللخر ماشدو غير الضباب، تلات بيهم ليام ولاو كيكومنطيو التصاور والأخبار ديال هاد المسؤول الأمني الكبير بالمنطق ديال "المسيميمات".
علاش مشا لقطر؟؟ علاش يكون هو أول مسؤول غير قطري كيزور الستاد لي غيتلعب فيه النهائي ديال المونديال؟؟ علاش يجلس مع المسؤولين لكبار؟؟ علاش قطر تطلب الخبرة ديال السيد فتأمين التظاهرات الرياضية؟؟ علاش يطلبو خبراء مغاربة فالأمن السيبراني؟؟ لا علاش يهضرو عليه فالصحافة؟ لا علاش يكبرو ليه فالشان؟؟ علاش فاش كيتفقد شخصيا الترتيبات الأمنية ديال كبريات التظاهرات الرياضية، كتنجح على كل المستويات؟؟ و علاش وعلاش وعلاش؟؟؟
ولأنهم عارفين بلي داويين خاويين، وعارفين بلي لمغاربة لحرار غادي يطليوهوم، كتلاقاهم ماقادينش على الهضرة لي كيقولوها وكيحبسو الكومونطيرات، بحال لي دار زعيم الزريبة علي المرابط، أو كيكاشيوهوم بحال لي دار ولد الكاطريام الهارب من العدالة الفرنسية.
ولكن المضحك فهادشي كامل هو هاد ولد الكاطريام الفاشل الهارب، لي سرط لسانو و غبر غبرة وحدة. قالك جاتو معلومات حصرية وغادي يعاود الفيديو هههههه الحقيقة أن الأحداث لي كتجيب ليهم الفقصة هي لي جات وحدة من مور لخرى.
الحموشي مشا لقطر وتلاقا بالمسؤولين وتباحث معاهم وزار الملعب ديال نهائي المونديال و تقرر يصيفط ليهم خبراء مغاربة وبمجرد وصل للمغرب، خدات المديرية العامة للأمن الوطني جائزة التميز الإفريقي في مجال الإدارة الإلكترونية، ومشا تفقد شخصيا الترتيبات الأمنية فدونور وداز الماتش فاعل تارك والوداد دات الكاس.... وولد الكاطريام بااااقي كيعاود الفيديو هههههه وااا مي كرشي معامن حنا.
ولكن المعلومات الحصرية د بصح ومن عين المكان هي لي غادي نكشفها ليكم كبوغطاط المغربي فالأيام لي جاية. حيت جبت ليكم خبارو كيف جبت خبار الزريبة كاملة... وحان وقت السقوط... واحد مور لاخر... والبداية مع ولد الكاطريام الهارب من العدالة الفرنسية لي باقي ما بغا يقول السبب الحقيقي ديال الهروب ديالو من فرنسا.
طبعا السبب الرئيسي كولشي عارفو وهو أنه عنف مراتو ونسيبتو وشبع فيهم تفرشيخ وزاد مع الطريق. ولكن لي عمر ما تهضر عليه ولا تكشف السر ديالو هو سبب داك الدباز لي كان بينو وبين مراتو باش وصل الأمر للتفرشيخ. أشنو حصلات عليه مراتو؟؟ شنو كان كيدير؟؟ وإيمتا؟؟؟ ومعامن؟؟ وفين؟؟ وعلاش؟؟ وشنو كان المقابل؟؟
هادشي لي غادي تجي الأيام ونكشفوه... ومااااا نعرف بأي طريقة.
واش غتشوفو تاني ولد الكاطريام حاني شي حنية بحال ديال السينياتور لي شافها العالم كامل وهو ملهوف على لفلوس ومحني كي الكلب كيسني؟؟ واش بشهادة الطليقة ديالو ؟؟ واش بشهادة الشريك أو الشريكة معامن كان متورط فأمر خطير؟؟ واش بجوجهوم؟؟.... مهم نخليوها مفاجأة.... وفالوقت المناسب... وهادي ما هي إلا شويكيييك من عراااام ديال المفاجأت والحصريات ديال بصح لي غادي تعرفوها على زريبة علي المرابط من الآن فصاعدا.... بقاو على القرص !!!