زمان العز مشا و تقاليد البلاد ولات منسية !! / شعر

بقلم الشاعر الزجال : يوسف الوزاني / المغرب
زمان العز مشا وتقاليد البلاد ولات منسية !!
واش باقين عاقلين على ايام التصاور المدرسية !!
ايام كنا نلعبو بلاستيك والشرطة والطرومبية !!
ايام البراءة ماكين لا هضرت فيك لا هضرتي فيا !!
ايام كنا نخرجو بكسوة العيد فالصبحية !!
باش نجمعو الفلوس من عند المختار والسعدية !!
ايام كانو الدراري الصغار يفرحو بالأضحية !!
ايام الشتاتاتاتاتا اوليدات الحراتا هههه والأمثال الشعبية !!
كان كلشي عايش على قد الحال وحاجتو مقضية !!
ايام تفيق مع الصباح وتفطر بالخبز وأتاي والزيت البلدية !!
ايام كانت اهم حاجة فرمضان هي الحريرة والشباكية !!
ايام المرأة دايرة اللثام والراجل لابس الجلابية !!
واش عاقل من كنتي تجري فالزنقة تابع الهدية !!
فين ايام سالي النمر المقنع ماوكلي و كونان فين هي!!
تخرج من القراية تجري باش تفرج فالروسوم ديال العشية !!
ايام كنا نتجمعو حول المائدة ونديرو جلسة عائلية !!
أيام الطون والحرور وجبان والشامية !!
ايام الرفيسة والسفة والكسكس فالقصرية !!
مشا زمان الحشمة والوقار ومشات النية !!
تبعنا تقاليد الغرب ونسينا التقاليد المغربية !!
ولا دابا شي حاضي شي ما ندق عليك ونتا مادق عليا !!
كلشي خرج الطريق مابقينا عارفين الدري من الدرية !!
هذا تبع الراپ وهاديك ولات "إيمو" والآخر تبع الماسونية !!
تبلينا بالفايسبوك وتبعنا المواقع الإلكترونية !!
ولينا عبارة عن مخلوقات فايسبوكية !!
هاداك فالسكايب مع السويدية وهاديك فالواتساب مخشية!!
ولا دري يخرج مع الصباح مايولي حتال العشية !!
من نتفكر دوك الأيام يطيحو دمعات من عينية !!
العين بصيرة واليد قصيرة والكبدة مكوية !!
ولينا غاديين وكانبعدو على الدين غي شوية بشوية !!
مشا الأدب ومشا الإحترام ومشات حتى التربية !!
من ولات البنت تابعة غي شاكيرة والافلام التركية !!
ومن تدخل للكوزينة ماتعرفش حتى اسماء العطرية !!
من ولا الولد يسهر حتى للفجر فالملاهي الليلية !!
وينعس حتال الظهر واخا تجيب ليه الدقة المراكشية !!
تبدل الزمان وتبدلت معاه حتى العقلية !!
وفزمان الحضارة مشينا ضحية !!
وجيل الايفون راكم مالعبتو حتى ربع العابنا الشعبية!!
راني عارف راسي طولت عليكم غي سمحو ليا !!
تمنيت نفهم علاش تبدلات عيشتنا ومالقيت اجوبة شافية!!