بْحال عَشْقي ليكْ...

شْفتيهم بْعيونْ الصْفا أقْلبي
وصَبْتِِهُمْ فالخْواضْ لاعْبينْ بيكْ
عْلاشْ ما شْفْتِيهُمْ بْعْيونْ الشْكوكْ
حْتَّى تْصافيكْ مْياميهُم وتْعومْ فيكْ
مَدى مَنْهُمْ وْزَنْتِهُمْ بالمَلايْكَةْ
وسْكاكْنْهُمْ لَهفانَةْ بيكْ
لا تَأمَنْ ولا تَسْتامَنْ فِيهُمْ شُوَكات
مَنْ وْراءْ سَعْفَة ْوهاذْ الشْدوق لاحَتْ
زحَّافَةْ كْروشْ الغْذَرْ تْقَلَّبْ الدْْفا فيكْ
***
عََنْد المَقابِيرْ العَزَّايا كُلْهُمْ شْرفاء و بكَّايا
وفْغَرقْ المَحابيرْ
تْشْرَبْ قْلومْهُم السَّمْ المْخَبِّي ليكْ
الكَلْبْ قْبَلْ ما يْعَضْ يْعْلَمْ بالنْباحْ
والشَّياطِينْ سوقْ المَحاريمْ رْماتْكْ فالمَهاليكْ
مْصيبتْنا فالرْهوطْ العَرْيانَة يادَنْيا
شْكونْ فالنَّدْمانينْ يْفَكَرْ يْوَلِّي ليكْ
من الوالِدينْ جاتْ التْرابي الفَضْحانَة
والرْيوسْ الخاوْيةْ ياعالَمْ
بالزَّخاريفْ سْكْرانَة فيكْ
تْخَلَّطْ وادْ الخّزْ بْوادْ صْفا
ويا وادْ الفْتونَْ سارْ مجْراكْ
فالرْيوسْ العَطْشانَة ليكْ
راحَتْ الصْدوقْ مْعَ الريَّاسْ الساَّلكين بْحورْ الصّْفا
أنا نْسال لبْحورْ
آشْ ذَنْبْ هاذوا اللِّي غَرْقو فيكْ
باعوا ليهُمْ لوهامْ فالظْلامْ
ويا واد "دْرا" عهدي بيك بين لجبال الشامخة
صَرت فالأنابيب ْ واشْ جْرى ليكْ
لا والي ولا تالي صارَتْ لْهْمومْ سارْحاني
وسارْحَةْ الهْمومْ وأخرى سارحة فيكْ
ماهو إلاَّ عْدوكْ مَنْ يْزَيِّنْ ليكْ مْلاهيكْ
قايْدَكْ لْطريق النار وباللَّذاتْ الموْهُومَةْ
مْعَمَّرْ ليكْ صْوانيكْ
نابَتْ فْدَمْنا العْدو خالَقْ فالطَّعْمَة
يْتْحَسَّفْ اللعين فْشْدوقْ المَخالِيقْ
كُلْ لُقْمَةْ وافيةْ
تابْعاها الشَّهْواتْ بالبْنادَرْ
وعلى ضَيْ مْجامَرها سايِرَةْ تْغَنِّي ليكْ
مولانا هاذو عَبادَكْ ضاقَتْ بيهم المَسالِيكْ
نورَانَكْ ملايْكَةْ تْبَعَّدْنا حَفرات المَهاليكْ
نْتْرجَّاو لَحْظَةْ سَكَنْ
ونْقا وصْفا
بْحال عَشْقنا ليكْ...
.. 31-3-2005. قرية الشاطئ.