قصيدة النَّدَّامة (زجل)

كيفاش ياعيني ما تْبْكي
وكيفاش يا قلبي ما تْحْزَن
سخايْ يا عيني بالدَّمعات اليوم
وغَرّْقي بها طَرفاتْ الجْفَنْ
علاش يا قلبي ما تبكي
وكيفاش ما تْسري مَنَّك الرَّعشات فالبْدَنْ
كيفاش يا عيني ما تبكي
والشَّاري شرى الكْفَن
***
يا ويحي العْمَر جْراتْ فيه خَيْل السِّنين
و الحَفَّار فتْراب قْبَري سايِر يْعْجَن
بْكي بْما فيك أعيني
وعلى الدّْنيا الفانية أراسي زيد حْزَن
على بحر لُوجَه سْفايِِن التَّوبات هايْمَة
واللَّوْعَة فالدْواخل ناطْقَة بأَلْف شْجَن
***
حْرَثْ أرض الدنيا بالزْروعْ يا سِّي راسي
ياحسرة عْليك إلا دانَتْ
والمعنى بانتْ
وطْلعاتْ ليك بْعِيدان التْبَنْ
أنت تْحْصد فالذْنوب
والملايْكة فلَلْواح تْدَوَّنْ و تْخْزن
شَلاَّ ما جْرَح لْساني
وشَلاَّ ما سَمْعاتْ لوذَن
يا الرَّاكب سْفينة لاخْرَة بْلا قْلوعْ
راكْ بْمجادَفْ راشية فمَّاجها تْهَدَّنْ
عبدتِ الناس وغَرّوك بالطْموع
حَفْيان بلا إيمان
سايِر فْطْريق الشِّيطان
أنت تْشري الرْبح
وهو يْبيع ليك الخْسارة بلا ميزان
المَخْزي يْبني فْديورْ لوهام
وأنت تْفرَّش وتْسْكن
***
يا حَسْرة عْليكْ جيتِ على الفْطْرة صفحة بَيْضا
مالو حالَك بْشْروط الشَّر تْغْبَن
مَدى من خْطِيَّة طمَعْت مَنها بالرْجوع
لكِن الشِّيطان ربَّطْ الخْدايِع بالرْسَنْ
***
نْقابلو الحَيِّين ما حْياتْ فيهُم لاجالْ
ونْتْقابلو موتى كُلْ واحد فْشَبْرو مْسَكَّنْ
شَفْتْ فالدْنيا من كُلْ زين خْلق الرَّحْمان
والكْثير فالمَزْيان غْطاَّوه النَّاس بالعْفَنْ
عْييتْ ما نْلوم فيك أَسِّي راسي
عييتْ...عْييتْ
لقيتْ العَين باب من دَخْلو يَتْفْتَنْ
شَلاَّ بلاوي ضاقْ بها مْداد الزَّمان
حَرْ نارها مْرارْ فالقْلوب تْمَكَّن
حْديث السَّافلين سَيْل مَنْ الشَّر
من جْبالْ الفَتْنَة العالية جايْ
جار مْعاه من البْلا كُل مَعْدَن
***
الصْدَر بأَسْرار الذْنوب مْعَمَّر
وْعَوْد اللْسانْ مْسمَّر
جْفَلْ لَلْخَلوات وبالصَّمت تْحَصَّن
خَلِّي ليالي لْْفْضايل مَثْواك فْبْكاكْ
ْبكي بها ذْنوب بلْجْبالْ تُوزَنْ
سَتْري يا عِيني عَبْد ظالَمْ بيكْ
يوم تْوزاع لْكْتوبْ
را ه الذْنوب حْديَّات
و القَلْب فْريِّخ كْسير الجَّنْحين مْمَحَّن
سْتري ياعيني عَبد ظالم بِك
فباب الرَّحمان إلا يْمْكَن
ورْجايَ ورْجاك فالعالم بْخْفيتي
يْغْفَر ذْنوبي بِكْ
يَرَدْ غُلبي بيك الرَّحْمان ويْعْطَف ويْحْسَنْ
قومي ما قامَت الظُّلْمة باللِّيلْ
قومي قَبْل ما تْبوحْ الرُّوح بالشْروح
و قبل ما يْتْلَقاو الجْفان فْطْرافْ الكْفَن
***
رَحْمَة رَبي واسعة بِيَّ وبِيك
كْمالي بها فالدْنِيَّة
وبلا إلاه إلاَّ الله تْطْلَع روحي عالية لْفوقْ
وفْرياض الجنة تْتْدْفَن والمَسْك كْفُنْ
بالله كُنْت ونْكون حْسَنْ مِمَّا كُنْت
والصَّلاة والسَّلام على سيدي فالخْلايِقْ
يالنَّادَم حَطْ عْلامو فَقلبك ووَطَّن
صَلُّوا عليه يالْعارفين بْمْقام العَدْنان
فْمْراح العاشْقين بْحُبُّو غادي نْتْجَنَّنْ
دَقْ وْتاد الصَّلاة والسَّلام عْليه فْأَرْضْ لْسانَكْ
راها خَيْمَتَّك بْحْبال الجَّنَّة تْتْمَكَّنْ
وسير فيها أَرْض مَليانة بالنُّور
زيدْ نُور على نُور
را اسمك بيه فالعْلالي يْتْعْلَنْ
جلال الدين محمد بازي