القَضِيَّة فالطاقِيَّة

قَالْها ومْشى فْحالو
راهَا قاضِيَّتْكْ فالطاكِية
والطَّاكِيَّة فْكَرْشْ السْبَعْ تْلاتْ يالْغْفيلْ
والسْبَعْ فغابَة قاصْية مْجْلِية
يا ليعْتي قاضْيتي فيها روحي
يا كِيْتي كيف نوصَفْ هاذْ البْلِيَّة
أنا خبَّرتك بْجروحي
والسْبَع راهو راحْ
وقَضِيتي بين ضْلوعو مْطْوِيَّة
تْبعتو حتى دْخَل لْغابَة عامْرة سْبوعا
"وكَّلْ السْبَعْ سبْوبْ" قالْ لْفهيمْ
تْوَسَّلْ عَنْد الطَّلْبة
وكُلْ فْقيهْ سْميتُو مَسْموعَة
حْرَقْ الغابة كُلْها
لكن شكون ضْمَن ليك طاقِية
بريحَةْ السبْوعا صارتْ مَطْبوعَة.
***
قَالوا: ما تْنَفْعَك غير السَّبْعة
مايْحَطْ النَّادَرْ فالغابَة
حتى يْدوَّزْ فْكَرشو شْطَّابَة
آيْ على وَحْلَة كَحْلَة
والَألْوانْ ُكلْها كَذَّابة
نْيابْ السْبَع صادَّة ليكْ
وأنْتَ صادْ لْهيهْ ومْلْهي بالكْتابَة
ضْبَعْ الحْروفْ اللِّي مْشى يْجيبْ لْخْبارْ
رابو عليه رْكَابيه
راحْ لحالو الصْكَع وماتْلى رْجَعْ
سير ألْمَتْلوفْ اللَّه يْجْليكْ
والنْمَر اللِّي طْلَبْتو يْدْخَلْ خِيطْ بْيَضْ
تْزَعْزَعْ
صَدْ للسْبَعْ وبْدا يْركَعْ
فينْ الطاقية أمولانا النْمَرْ
اللِّي شاف مْخالبك والنْيابْ يقول هنا نْباتْ
علاشْ تْسلَّم أبو لْكتافْ...
صَيْفَتْ القَرْدْ الضَّحاكْ شاف السْبَع
ورْجَعْ يْوَلْوَلْ..
فَكَرْت نْبْني لو سُورْ ونْسَيْجو
ونْمشي لو عاري
كيفْ نْعْمَلْ وريحْ بْنادَمْ يْهَيْجو
عْطى ظَهْرو لْحَيط
سوَّلني شْنو جاري
قُلت لو: هْرْبَتْ لي الحوتَة بالقَصْبة والخَيط
عار الله لوحْ لي الطاقِية يا سْبَع السْبوعَ
ضْحَك ْ مْلِّي عْرَفْ روحي فوقْ راحْتي وقَال:
اللِّي جاء عَنْد عْدوه ما يْطْمَعْ فْرجوعْ
وحوش الغابة يقولو لي: سلّم وْوَلِّي
راكْ غادي بْرْجليكْ لْهلاكْ
سلّم وولِّي ياراكب لْغرورْ
وصّاني الفْهيم :
دُورْ من اللُّور وخْلِي الحَيْط
شْكون يقولْ للسّبَعْ فُمَّكْ خانَزْ
بَعَّدْ من نْيابْ السْبَع ما تْبقى طانَزْ
قَرَّرْتْ نْواجْهو ونْمْشي من البابْ
نوقَفْ قْدَّامو بْلا حْجابْ
عَمَّرْتْ قَلْبي باسْمْ اللَّه
وهْجَمْتْ عليه: فايْنَكْ يا عَدِوْ الرَّحمان
لْقِيتو مَلْيوحْ فالأَرض الذْبانْ يْزَنْزَن فوذْنيه والطاقية مْليوحَة حْداه..
واشْحالْ مَنْ سْبَعْ مات
وطْرَحْ القَضِيَّة فالصْماتْ
واشْحالْْ مَنْ كَلْب راخي وْذْنيه
مْعَمَّرْ الدّْنيا بالغْواثْ
واشْحالْ مَنْ قَضِية تْوَرْقَتْ
واشْحالْ مَنْ قَضِيَّة مْعَ مولاها مْشاتْ
راها فطاكَية بلا سْبَعْ تْخَبَّاتْ
واشْحالْ مَنْ كَفَّة فْميزانْ الباطَلْ عَلَّاتْ
رام مولاها لْعروشْ فالسَّمَواتْ
وفْحَفْرَةْ مْظَلْمَةْ بيه نْزْلاتْ
واشْحالْ مَنْ واحَد ْيْجري وْرا الدنيا
والموتْ فْطرافو جالَتْ مَرَّاتْ
واشْحالْ مَنْ حْياةْ بْداتْ بَسْماتْ وكَلْماتْ
وكْمْلاتْ بالدْموعْ والغْواث....
قرية الشاطئ تفنيتْ..../6/2004