بعدما دخلو الرجاء فالحيط.. البدراوي واللي معاه غرقو المارشي نوار بدعوات ماتش الخضرا والأهلي

المشاكل زايدة وكطيح على الرجاء الرياضي في مرحلة الرئيس الحالي عزيز البدراوي، اللي بزاف من المعطيات تشير إلى قرب الرحيل ديالو عن النادي سوا بالاستقالة أو الهروب، وهاد المرة مشكل كبير كاين في تنظيم الماتش ضد الأهلي المصري ضمن إياب ربع نهائي عصبة أبطال إفريقيا، من جانب الإدارة، حيث المارشي نوار غارق بالتذاكر والدعوات د المباراة مقابل أموال خسارتها الجماهير من جيوبها باش تشري بطائق الاشتراك أو تيكي المباريات رغم ارتفاع أسعار الأخيرة.
وحسب مصادر مطلعة، فماتش الرجاء الرياضي والأهلي المصري عرف تخصيص عدد مهم من الدعوات وهذا الشي كيشرف عليه النادي بشكل مباشرة، والغريب في الأمر أنه تم تبرير توفير هاد الدعوات على أنه غيتم توزيعها على السلطات، ولكن الحقيقة هي أنها تحطت فالمارشي نوار كتباع في واحدة من الفضائح الجديدة ديال المكتب الحالي اللي على راسو عزيز البدراوي.
مجموعة كبيرة من مكونات الرجاء الرياضي تشكات من إغراق المارشي نوار بدعوات ماتش الرجاء والأهلي المصري، خاصة أن إدارة عزيز البدراوي منذ مدة وهي زايدة فأثمنة التذاكر على الجماهير الرجاوية، ومن بينها ماتش الديربي الأخير اللي وصلت فيه أرخص تذكرة 100 درهم، والرجاويين كيحملو مسؤولية إغراق المارشي نوار بدعوات ماتش الخضرا والأهلي لرئيس النادي عزيز البدراوي ورئيس اللجنة التنظيمية عبد الفتاح الحسيني.
ومن المنتظر يعرف ماتش الرجاء الرياضي والأهلي المصري غدا السبت بستاد دونور حضور كبير لجماهير الفريق الأخضر، رغم الارتفاع المستمر لأثمنة تذاكر الماتشات في عهد الرئيس الحالي عزيز البدراوي، اللي تزادو المطالبين بالرحيل ديالو من النادي حيث وصلت الرجاء معه إلى مرحلة صعيبة بزاف وكارثية غير مسبوقة في تاريخ الفريق اللي كيتعتبر من أكبر الأندية المغربية والأفريقية وأعرقها.