واش عارف قيمة الديربي عند الجمهور؟ البدراوي: اللي غاليا عليه التذكرة ما يجيش لدونور

كيواصل المثير للجدل عزيز البدراوي رئيس الرجاء الرياضي خلق البلبلة بالخرجات المثيرة ديالو، ومن بعدما كان كيقول خلال الترشح ديالو "الرجاء نعطيها دمي" دار دابا للجمهور باش يجمع فلوس يحاول من خلالها يخفف من الأزمة اللي كيعاني منها النادي معه.
البدراوي من بعدما خرج في انستغرام كيعلن أن الجمهور حاضر في الديربي ما بين الرجاء والوداد، ناض تفاعل مع احتجاجات شي جماهير على الزيادة اللي دار في ثمن التذاكر واللي وصلها الى 200 درهم وجاوب المشجعين المحتجين وقال: "اللي ما عندوش ثمن التذكرة أو جات غالية، ما يجيش لدونور ويتفرج في دارو فابور راه المقابلة منقولة مباشرة في بزاف القنوات الرياضية لا يكلف الله نفسا إلا وسعها".
جواب عزيز البدراوي نوض عليه الصداع وغضب الجماهير على مواقع التواصل الاجتماعي سوا الرجاويين أو الوداديين، وكاين اللي اعتبروا من خلال طريقة الجواب والتعبير ديالو ما كيفهم والو في ديربي مدينة الدار البيضاء، اللي الطعم والحلاوة ديالو هو الجمهور.
للإشارة فعزيز البدراوي رئيس الرجاء الرياضي، حدد ثمن تذاكر ماتش الديربي بين الرجاء والوداد اللي غيتلعب الأربعاء المقبل بستاد دونور، برسم الدورة 21 من البطولة الإحترافية لكرة القدم في 100 درهم و 200 درهم، هذا خلف غضب كبير عليه من طرف الجماهير الرجاوية والودادية.