جمهور الرجاء ناض للبدراوي بسبب الميركاتو وغياب مهاجم قناص

تقلق جمهور الرجاء الرياضي بزاف على رئيس الفريق عزيز البدراوي بسبب الانتدابات اللي دار فهاد الميركاتو الشتوي، كيشوفو على أنها محدودة بزاف وأنه ما عندو كلمة وما غاديش يقدر يطول بزاف فرئاسة النادي بهاد الطريقة ديال التسيير وجمع التبرعات فالصينية اللي خرج هادي أيام.
جماهير الرجاء الرياضي بمجرد مع ما سالا الميركاتو الشتوي بالمغرب منتصف الليلة الماضية، سلطت غضبها على عزيز البدراوي رئيس النادي وهاجماتو بمواقع التواصل الاجتماعي، وكتعتبر بأنه ما وفاش بالوعود ديالو اللي كان كيقول خصوصا فيما يتعلق بانتداب مهاجم رأس حربة قناص اللي غيحل مشاكل الفريق فتسجيل الأهداف وهذا كان مطلب المدرب منذر الكبير والرجاويين.
وأكدت جماهير الرجاء فبزاف ديال ليباج فسوشيل ميديا، على أن عزيز البدراوي ضرب الثقة اللي دارتها فيه فالزيرو والميركاتو الشتوي ما كانش مختلف بزاف على الصيف اللي فات، حيث البدراوي ما جابش شي اسماء كبيرة باستثناء نوفل الزرهوني اللي جا إعارة من الحزم السعودي باش يرجع الفورما حتى نهاية الموسم، وصانع الألعاب اللي كان كيتكلم عليه البدراوي ملي بدا الميركاتو طلع عبد الإله الحافيظي اللي مشكوك فالمستوى ديالو واش يقدر يعطي الاضافة ملي رجع دابا للخضرا من بعد تجربة فاشلة بالحزم السعودي، وزكرياء الوردي اللي محتاج للوقت بسبب الأزمة اللي كيدوز منها بعد تجربة فاشلة مع الزمالك المصري واصلا ما يقدرش يلعب دوري أبطال إفريقيا.
الصفقات اللي وقع الرجاء الرياضي فالميركاتو الشتوي اللي سالا، هرس الثقة ديال جمهور الفريق فالرئيس عزيز البدراوي، خصوصا وأن الأخير كيعطي وعود كثيرة وكبيرة ولكن ما كيوفيش بها فحال الوعد اللي كان قدمو مع نهاية الموسم الماضي، ملي جاب المهاجم الكونكولي مالانكو وبدا يدور فيه على ستاد دونور وقال للجمهور بلي غيكون مع الفريق فهاد الموسم، ولكن حتى حاجة من هادي ما تحققت وفهاد الميركاتو اللي سالا أيضا ما وقعت داكشي اللي كان كيواعد به وحتى مهاجم قناص ما سنا معاه.