بعدما دازت شهور عليها.. بونو كيكشف سبب الدوخة اللي غيباتو على ماتش المغرب وبلجيكا فالمونديال والقضية فيها كينة مسكنة

كشف الدولي المغربي ياسين بونو على السبب اللي خلاه يغيب فاللحظة الأخيرة على ماتش المنتخب المغربي أمام بلجيكا برسم الجولة الثانية من دور مجموعات كاس العالم قطر 2022، بعدما دخل للتيران وحضر مع اللاعبين للنشيد الوطني المغربي وهو يغبر وتفاجأ الجمهور اللي كيتفرج أن اللي حابس فالماتش هو الحارس الثاني منير المحمدي ماشي بونو، وكان المحمدي دار ماتش كبير وقد المنتخب المغربي يربح بنتيجة 2 لزيرو واستمرت الرحلة ديال الأسود بعدها حتى لدومي فينال المونديال.
وتحدث الدولي المغربي على حادث الغياب ديالو المفاجئ عن ماتش المنتخب المغربي وبلجيكا بعدما دازت عليه حوالي 6 أشهر وقال فتصريح نشراتو "بي بي سي وورلد سيرفس سبورتس" البريطانية على موقعها: "فالماتش الأول ديال المنتخب المغربي بالمونديال اللي كان ضد كرواتيا توعت حيث تصاطحت مع شي لعاب ديال الخصم، وباش نوجد مزيان لماتش بلجيكا كان خاصني ناخذ كينة تهدن عليا الحريق ديال الإصابة".
الموقع البريطاني ذكر أن طبيب المنتخب حذر ياسين بونو من أن آثار مسكن الألم كتستمر ما بين 60 و90 دقيقة، وقرر بونو يدير التسخينات أولا ثم ياخذ الحقنة المسكنة قبل وقت قصير من انطلاق المباراة.
وكمل ياسين بونو وهو كيشرح شنو وقع له وقال: "دخلت لكولوار ديال التيران مع المنتخبين، كنت كنحس بالدوخة بزاف، وتكلمت مع الكابتن د المنتخب المغربي رومان سايس وقلت له راني ماشي بخير".
ياسين بونو ملي حس بالدوخة تبرزط بزاف ومشى عند حكم الماتش سيزار راموس، باش يسولو شنو كيقول القانون ديال التغيير بعد عزف النشيد الوطني، وكشف بونو جواب الحكم وقال: "قاليا ما كاين حتى مشكل، راه تقدر تحضر لعزف النشيد الوطني ومن بعدها يمكن لك تخرج، ومشيت إلى عيادة داخل التيران وحسيت بتحسن وتفرجت فالشوط الثاني".
ياسين بونو مازال عاقل على الإحساس ديالو فهاديك اللحظة ملي خرج من التيران وغاب على ماتش المغرب وبلجيكا في آخر لحظة ووصفو وقال: "كان صعيب عليا الحال بزاف حيث كلشي كان كيشوفك طالع للتيران وواقف خلال عزف النشيد الوطني وبعدها كتغبر، هذا الشي كان صعيب عليا حيت كنت باغي نلعب الماتشات كاملين، وكون خسرنا ما كنتش غنلعب مازال فكأس العالم، ولكن ربما وبعدها داز كلشي بخير".