طلعت ليه السخانة وضروه المصارن.. كلشي كيتسنى يعرف شنو عند ياسين بونو ومدرب إشبيلية خلع عشاق النجم المغربي

تعرض ياسين بونو نجم المنتخب الوطني المغربي لوعكة صحية مفاجئة بعداتو على ماتش فريقو إشبيلية الإسباني ضد إندهوفن الهولندي، فمنافسات الدوري الأوروبي لكرة القدم.
وحسب الأرجنتيني خورخي صامباولي مدرب إشبيلية، فياسين بونو شداتو السخانة قبل الماتش ضد إيندهوفن الهولندي، وبالرغم من المحاولات ديالو باش يكون حاضر فالماتش ولكن تزاد عليه الحال ملي وصل للتيران وتقرر الاستبعاد ديالو، وأنه يرتاح فانتظار التقرير الطبي حول الحالة الصحية ديالو.
المدرب ديال إشبيلية قال بلي ياسين بونو عندو شي حاجة فالمصارن، وأن السخانة طالعة له دون ما يعطي شي توضيحات كثر على الحالة الصحية ديالو.
وكيسود جو من الترقب وسط جماهير إشبيلية الإسباني وكلشي كيتسنى يعرف الحالة الصحية ديال ياسين بونو، وصدور شي بلاغ من النادي فالساعات المقبلة يوضح فيه شنو عند النجم المغربي، من بعدما تجرى له الفحوصات ويخرج التقرير الطبي ديالو.
وهادي هي المرة الثانية اللي كيوقع فيها هاد السيناريو لياسين بونو، حيث كان غاب بشكل مفاجئ وبنفس الطريقة على المنتخب المغربي ضد بلجيكا فكوب ديموند حتى آخر لحظة حيث جاتو الدوخة.