هادي فضيحة لحرية التعبير والنشر فمعرض الكتاب؟..الوزارة منفاتش سحب كتاب حمودي وصحاب دار النشر لي طبعات الكتاب مخلوعين ومبغارش يهضرو على منع كتاب فيه مواقف على السياسة بالمغرب

واش بصح وزارة الثقافة سحبات كتاب "حضور في المكان – آراء ومواقف" ديال عبد الله حمودي المؤرخ والأثربولوجي المغربي، من المعرض الدولي للكتاب في دورته 28 بالرباط؟ سؤال وجهناه لدار النشر، مبغاوش يجاوبو مخلوعين. موضوع مبغاوش يهضرو فيه.
وزارة الثقافة فاش سولناها عطات جواب غامض، منفاتش حقيقة سحب الكتب، وبررات كولشي بلي الكتاب مكانش مبرمج يتم التوقيع ديالو .
يشار بلي حمودي، للي كتب كتاب زوين على السلطوية بالمغرب بعنوان الشيخ والمريد، قال إنه تفاجأ بسحب كتابه "حضور في المكان – آراء ومواقف" من أروقة المعرض الدولي للكتاب المقام الرباط.
وحسب تصريح حمودي لموقع "لكم" فإن اللي وقع هو فاش جا لبارح السبت فالعشية باش يوقع كتابو لي كان محطوط فجناح الدار الناشرة، تفاجأ بلي مبقاش الكتاب يعني تسحب.
حمودي قال فتصريح لنفس الموقع، بلي الناشر أخبره بأن موظفين تابعين للمعرض حضروا مساء الجمعة وسحبوا جميع النسخ المعروضة من الكتاب، دون تقديم أي مبرر أو سبب.
وأوضح حمودي بلي الكتاب ديالو كيهضر على عدة قضايا سياسية وطنية ودولية، مضيفا: "الكتاب كيتبع السياسة عن كثب بحال التغيير السياسي والإصلاح ودور المال والسياسية والقضية الفلسطينية والسياسة الأمريكية .. والثقافة وكتابات علمية".