واش هذا بلوكاج جديد ضد القانون الجنائي؟. الرئيس الجديد للجنة العدل والتشريع عاد بدا خدمتو وباقي ثقيل مقارنة مع القوانين الكثيرة لي كتسنا البلاد

لجنة العدل والتشريع وحقوق الانسان، كتسناها مشاريع قوانين كثيرة وكبيرة كتهم المغاربة، قوانين تقدر تحدد مصير الأجيال المقبلة، لكن باقا معطلة فخدمتها باقا عاد بغات دير برمجة الاجتماعات.
دبا دازت 3 أسابيع على انتخاب رئيس جديد للجنة العدل والتشريع، وذلك مور فيلم طويل من التشويق فهاد اللجنة بحيث للمرة الرابعة كيتم انتخاب رئيس جديد، لكن آخر مرة كان الانتخاب مور فضيحة اختيار محمد مبدع يكون رئيس هاد اللجنة قبل ما يقدم استقالتو ويتم اعتقالو بتهم تتعلق بالفساد الاداري والمالي.
اليوم الاثنين 5 يونيو مور الجلسة العامة بمجلس النواب، عاد قررت اللجنة دير لقاء المكتب باش تحط برمجة أشغال اللجنة.
اللجنة كيتسناها مشروع القانون الجنائي والعقوبات البديلة والمسطرة الجنائية وقانون مهنة المحامين وغيرها من المشاريع لي تعد ثورة في قطاع العدل بعدما حرك وزيرها عبد اللطيف وهبي المياه الراكدة ودار مجهود باش يخرج هاد القوانين للنقاش العمومي والتشريعي.