"كود" تنفرد بنشر مذكرات محمد سقراط الحلقة 28/: نا كان عندنا نهار الثلات , وأنا مرضت لخميس وباش نشوف الطبيب كان خاص نبقى حتى لنهار الثلات نتسنى ومحافظ على المرض ديالي منخليهش يمشي باش نشوف الطبيب اللي دوز معاي قل من دقيقة وعطاني دوا غامل

أقود حاجة تقدر توقعليك فالحبس هي يموت شي واحد عزيز عليك برا, أو تمرض فالحبس, أنا الحمد الله مامات حد عزيز عليا برا, ولكن مرضت فالحبس , حيث كنت كنبقى واقف حدا التيليفون فالصباح تحت شمس مراكش الجحيمية , فصمكاتني الشمس وجاتني السخانة والحلاقم, وطحت شاد لفراش واحد الطيحة مقودة ماتبغيهاش لعدوك.
كاين الطبيب فالحبس, ولكن كل كارتي عندو النوبة فنهار واحد فالسيمانة, حنا كان عندنا نهار الثلات , وأنا مرضت لخميس وباش نشوف الطبيب كان خاص نبقى حتى لنهار الثلات نتسنى, ومحافظ على المرض ديالي منخليهش يمشي باش نشوف الطبيب, ولكن فالأيام العادية كاين الفرملي , واحد ولد القحبة أصيل كنتمنى نتلاقاه دابا باش نبوليه على وجهو, كتمشي عندو فأي حالة ومريض بأي مرض كيعطيك أسبيرين فقط, واخا تكون فيك الموت , وداكشي لي دار معايا أنا نيت, وقاليا تسنى حتى لنهار الثلات . وحيث مجبر معندي ماندير تسنيت حتى لنهار الثلات, ولكن قبل هادشي وصيت لواليد يجيب ليا الدوا, ودبرت على شي كينات من عند الدراري فالحبس .
قاليا يوسف شوف أعشيري راه فالحبس ماشي غي الكارو والسلعة لي مهمة, راه حتى الدوا, ديما وصي واليديك يجيبوليك دوليبران وآسبرو والسيرو ديال الصدر وسوركام, وشوية ديال لعشوب زعتر والشيح واللويزة والقرنفل, راه هادشي كينفع فالحبس, راه هنا الإدارة ماغادي تعقل عليك بوالو واخا تموت, واليديك هوما كولشي, وهوما لي تعول عليهم, والى جاك الدوا خزنوا متبينوش لبنادم, راه الى تعرف عندك دابا وساعة يولي جاي عندك بنادم .. خويا سقراط عندك شي كينة ديال الضرسة... خويا سقراط عندك شي كينة ديال الراس , ديما دير الإحتياط ديالك للحزة, راه الحباس الحقيقي هو لي يكون عندو كولشي, بدا من لبرا ولخيط حتى للسطل والبانيو .
قبل ماتشوف الطبيب خاصك تدوز عند شاف كارتي يقيدك فواحد الدفتار, وهو كيديه للمصحة, من بعد كتمشي توقف حدا المصحة فالشمس, وتسنى الفرملي يعيطليك, والى خرج وعيط وملقاكش داز فيك التران, ومكايناش شي ساعة محددة لي يقدر يعيطليك فيها, يعني التسعود خاصها تلقاك فباب المصحة, ونتا و هرك يقدرو ميعيطوليك حتى للحداش, داكشي مرتابط بفوقاش كيجي الطبيب على كانتو , والطبيب مكيقلبك مكيقودليك, كيسولك كيشوف من البعد كيكتبليك الدوا, مفايتاش دقيقة, كيدوز ديك العشرين واحد, كيقود بحالو بسرعة خاطفة, كتحس بيه بحال الى جايبينو بزز بالمينوط .
أنا نسا شاف كارتي مقيدنيش, ملي مشيت بقيت كنتسنى حتى طاب ليا كري, من بعد سولت الفرملي قالي نتا ممقيدش, وقتلوا كيفاش ممقيدش راه مشيت عند شاف كارتي وقيدني وراني مريض كنموت ,... بلا متفرع ليا كري, قتليك ممقيدش ممقيدش, سير عند شاف كارتي دبر لكرك معاه .
مشيت عند شاف كارتي, قتلوا راه مخلانيش الفرملي ندخل قاليا ممقيدش ... قاليا : هاداك ولد القحبة ديال سماعيل زامل مع كرو, فيه هاد لخصايل ديال تقلوة .
مشا معايا حتى للمصحة وهدر مع الفرملي ورجع للبوسط ديالو, وغي رجع قاليا الفرملي شتي نتا ممقيدش وبرب لدخلتي .
مشيت للرومبة ديريكت عند رئيس المعقل, كي وصلت طحت فالأرض ودرت موتة حمار .. مابانلياش رئيس المعقل وجا عندي نائب رئيس المعقل, واحد سي هشام دري باقي صغير, وقاري والله يعمرها دار, والحبس كلو كيشكرو, ولد قلعة الصراغنة راجل ومحكارش, وكيوقف مع بنادم وكيقدي الغراض, وخدام من نيتو وعندو مبادئ, قاليا مالك أسقراط : قتليه هانتا كتشوف مريض كنموت وهاداك الفرملي مخلانيش ندخل عند الطبيب .
_مايمكنش أسقراط غادي تكون نتا رديتي عليه الهدرة, أو قودتي معاه السوايع .
_وأنا ماقادرش نهدر كاع آشمن هدرة رديت عليه, نتا راك عارف هاداك كيداير .
_شوف أنا غادي نديك ولكن عنداك تكون مكحلها معاه وتحشمني, نتا راه فمك كيصبقك وباقي مخلطليك السيفيل مع الحبس .
_وا والله مقتليه شي حاجة راه شاف كارتي دزت عندو يقيدني, واقيلة نسا, والفرملي قالي ممقيدش والله لدخلتي, وأنا هاني كتشوف بعينيك موحال نكمل المونتيف الى بقيت بهاد الحالة, واش مكايناش شي حاجة سميتها حالة مستعجلة ؟
_نوض يالله للمصحة .
مشا معايا سي هشام للمصحة دخلني وبقا هو والفرملي كيهدرو شحال, شوية الطبيب خارج غادي بحالو, وهو يوقفو سي هشام, عافاك أدكتور راه هاد الدري مريض بزاف وبغا يشوفك.
نقز الفرملي:_ ولكن راه ممقيدش .
شاف فيا الطبيب وقاليا واخا زيد دخل .
مجيريبة كان علمني أنني عمري منمشي للمصحة بلا منعكد راسي بشي شرويطة, ونقلب عينيا. ومن الأحسن يديني شي صاحبي متكي عليه, المهم نبان أنني قريب نموت, حيث الى مشيت واقف على رجليا راه ماغادي يقديو معايا غراض, وداكشي لي كنت داير ملي شاف فيا الطبيب بنتليه راه بصح مريض .
دخلني قالي آش عندك قتليه لحلاقم والسخانة , قاليا حل فمك شاف آش كاين كتب ليا الدوا, مكاملاش دقيقة . أنا كنت كنتسنى يعطيوني شي آنتي بيوتيك هو لي غادي يحل الموشكيل, ساعة هاد الروينة كلها على عشرة دوليبران, وواحد الكينات خريين قدام غاملين مشربتهم كاع . من داك النهار تعلمت واياك تمرض فالحبس, والوقاية خير من علاج هاد ولاد لقحاب .