حاجيتكم: على داك اللي غبر حتى دار الشعر وعلى التبلبيلة جا يسهر.. هو إلياس واكل الحب والتمر

كان او كان...في مكان الريف وفزمان الغليان وفقرية فإقليم الحسيمة سمها النكور..
تزاد إلياس، السياسي اللي يحكي ويحاكي ويقول الروايات والحكايات على المخفي والمستور...
يحكي إلياس باللي فالصغر.. كان يلعب فساحة القرية وي يتخايل ليه بلي النكور هي كاع العالم ومن بعدها كاين غير الشمس والقمور..
يجيو رجال السلطة فالنكور ويقولو لناس الدوار نوضو شطبو الساحة إلى حبيتو تشوفو صندوق لعجب وتشوفو طرزان وتشيكا وتشوفو آش واقع فبلاد المعمور..
كبر إلياس وهو يحلم حتى هو يولي من رجال السلطة ويأمر وينهي ويحكم ويتحكم في كل الأمور...
يولي يقول للناس شوفو طرزان بلاما تشطبو الزناقي هادي راها النكور ماشي قرية بني قرقور...
ولكن هداو بلاتي راه سوارت صندوق لعجب غايكونو فإيديه واللي ما يطيعو يدير بيه لمكايد وماكاين لا تايب ولا مغفور...
وفيوم من ليام الشينة...جات شي خبار من لمدينة بلي فمدون الشمال كاينة شي تبلبيلة وحتى فجيهة أقشور...
ناض إلياس وصحابو وقالو هادي لوجيبة ونوضو حتى حنا نهجمو على مكتب لخليفة ونديرو ما دارو زمان فالقايد العيادي ولاد قدور...
وفالليلة الهبيلة دخل إلياس وصحابو ودارو الهليلة وهرسو وخربقو وقلبو وشقلبو وقالو صافي مكتب لخليفة ديالنا وخداتهم النشوة وعمهم السرور..
كانت البيعة الكبيرة وجاو رجال السلطة يسولو شكون مول الهليلة؟ وهرب إلياس وتشدو صحابو ومنهم ولاد عمور...
يحكي إلياس باللي مشى وتمشى تلت أيام وتلت ليالي يحوص ويدور حتى وصل لفاس، لدار العلم والقلم وتخبى فصحاب اليسار أو ولى مبهور..
يقول بلي تعلم ففاس كيف يفك الخط وياكل البط وبدا يقرى على القلة ويعرف فين جات القبلة وفين السبع بحور ..
دخل القمقم وغاب عام وعامين ومشات إيام وجات إيام وهو غابر ومخفي... او واحد النهار جات لخبار بلي عفا عليه سيدنا الله يرحمو هو ورباعتو وفرح إلياس وزغرد حيت ولى يظهر للعيان أو ولى غالب او منصور..
خرج إلياس من القمقم وتلاقى سي بن زكري الله يرحمو وقال نولي حتى أنا متصالح ومنصوف وما نبقاش مضرور...
يحكي إلياس بلي مشات إيام وولات إيام وهو يجري ويجاري مع الرفاق ويقول غادي نولي من اللي يبيعو لخبار بالأجور...وفي الصحافة بانت ليه الهوتة وجسر العبور...
جا شي زلزال فالحسيمة وناض يجمع لبطاطن ويخدم ويدور مع مالين الدواور ويجيب لعوين من لقريب ومن لبعيد واللي مورا لبحور.. حتى ولى مشهور...
قالو الناس هادا ماشي شين.. هادا زين وبداو يشكرو فيه ناس الريف راه بيين حنة يديه وجاب المونة ولبطاطن وهو ولد البلدة ومتواضع وماشي مغرور...
وواحد النهار أولا وحدة من الليالي.. في دار لحليمي تلاقى 'صاحب صاحبو' وقال صافي عندي الحل وأنا اللي غادي نجمع الشمل ونجيب كاع صحابي وحتى دوك مالين التبلبيلة اللي تابو.. ونولي جار وما نبقاش مجرور...
يروج بلي دار شي حركة وسماها لكل الديمقراطيين ودار بها لعجب وصار نائب أمين عام الجرار... وجاب حبابو وصحابو وحتى من سابع جار.. حيت ولى بطل معروف..مابقاش مغمور...
ولى يتكلم على ماركس واليسار ويقول تلاقيت شيغيفارا وتعشيت مع كاسترو وما غاديش نحير فولاد قدور..
دازت إيام وجات إيام وجاو الإخوان يجريو..وعلى راسهم بنكيران... جابتهم شي تبلبيلة كانت واقعة فمصر والسودان وقالو راه ما غاديش تسلم لبلاد بلا بينا من الشرور...
توجسنا وجلسنا نحيضو ونبيضو ونقولو ويك ويك أش بغاو بينا هاد رباعة أردوغان.. خاصنا نتفكو بالحيلة ونزيلو الشوكة بلا دم راهم قباح وداك بنكيران ديالهم يحكي على العفاريت والجان ويخلع فينا كيف المسعور..
ناض إلياس وقال هداو بلاتي أنا راني يساري وجالست كاسترو ونعرف نتعامل مع تجار الدين، ..غير تيقو فيا راني عندي شي خلطة ونعرف نجاوب ونداوي السحور.
وولى إلياس يحكم ويتحكم و يقول غادي نقضي على الإخوان.. أنا حاكم الريف وجوج بحور...
جا وقت الشوار وطلع إلياس أمين عام الجرار.. مابقاش غير نائب وحتى الجهة الشمال خداها رآسة حيت هو مول لبطاطن والحسيمة.. يقول يعرفها دار بدار والناس تموت عليه.. يحكي ديما حيت هو مول السياسة ويفهم ويعرف كل الأمور..
بنكيران يهلل وإلياس يطبل وبداو يتعاطاو هادا يقولو عفريت بانضي ولآخر يجاوب إلى قديتي عليا غير سير كول التبن.. أنا راني واعر عليك راني وليت صاحبو.. مابقيتش غير صاحب صاحبو.. راني مطور والجان اللي تحكي عليه أنا اللي مسخرو وغير تسنى وقت الشوار راك غادي تخرج من الحكومة بسبابي مقهور...
جا وقت الشوار ثاني وبنكيران زاد تقوى والإخوان بقاو لينا.. يفقصو فينا وإلياس جا هو التاني وهو مواعدنا يجي الأول ويخرجهم بلا والي ويخرج هو غالب او منصور...
حتى من هلو فالحسيمة دارو شي تبلبيلة وملي مشا يهديهم يقول ليهم ياكم؟ حشوما عليكم ياك خديتو لبطاطن فأيام الزلزال وأنا رئيس الجهة ومنكم وعليكم؟ قالو ليه باراكا من الزعت راه لبطاطن.. دابو منذ عصور...فينو السبيطار باش واعدتينا؟ راك بالوعود عييتينا والصبر معاك تقادا من شهور...
من كم لكذبات لكبيرة، ومن كم الخيبات لكثيره ما بقى حد يصدق مول تعشيت مع كاسترو وتغديت مع أوباما ومشى إلياس غبر غبرة وحدة بلا كتبة وبلا عشور..
غاب إلياس عام وعامين حتى تنسى او ولاو الناس يحكيو ويتحاكو وشي يقول ولا درويش ولي يقول ولا من سكان لقبور...
ملى جا وقت الشوار تاني.. ماكاين لا خلطة ولا سحور.. جا عزيز وعبد اللطيف و نزار وقالو راه العلم زين والمؤسسات هي اللي تطير تجار الدين وما كاين غير الخدمة النقية او شوية دلعوين..
نخدمو مع مول لبلاد بالمليان ماشي بالخاوي ونديرو تغطية صحية ونديرو حقوق المرأة بالصح ونبدلو القانون راه قديم بزاف ومرات عليه عصور...
نعطيو شوية دالحرية باش لوقت تزيان.. راه هادشي قالوه العولاما والمفكرين وداروه الدول المتقدمة دالمزيان، وما فيه.. وما فيه لا كافور لا بخور.
رجع إلياس تاني مول "المغرب.. جبل..شامخ" وما عرفاناه كيف خرج من القمقم آ ولا شرب من ما دزمزم وفهسبريس قال أنا وليت فيلسوف نعرف أفلاطون وسقراط وفالمهرجانات ولى يدور..
علاش يقلب؟ الله وعلم.. المهم عزيز وعبد اللطيف ونزاز باقيين خدامين على التطور بالعلم وتنضيم القوانين كلها حتى من المرور... وهو باقي يحكي.. كيف ما كان.. على لعشا مع كاسترو ولغدا مع أوباما ويقول عمر الإخوان ما يموتو وتجلس معاه يفكرك براجل الشعيبية.. كبور