كيفاش لعب الياس العماري دور فهاد المقاطعة. قبل فترة هاجم اخنوش وعايرو ب”مومبة ليصانص” وناسو محيحين مع المقاطعة واعلامو طيح الباطل بهاد لخبار

الياس العماري الامين العام الحالي لحزب الاصالة والمعاصرة ورئيس جهة طنجة الحسيمة ما كيموتش قربات نهايتو مع تحديد تاريخ للمجلس الوطني المقبل وطبعا رفض الاستقالة ومازال رافضها واخا اقرب المقربين منو اللي خلقهم ودارهم من منطقتو الريف تخلاو عليه٬ حتى ركب على هاد القضية ديال مقاطعة 3 شركات من اصل مئات الشركات.
ناسو خدامين بزاف فالمقاطعة. كيروجو ليها كيدعموها كيساندوها. ناس الياس فالبام مع الشعب. واييه مع الشعب. المشاركين فمسيرة ولد زروال ولاو مع غلاء المعيشة ومع المقاطعة وماشي اي مقاطعة. مقاطعة 3 شركات.
هاد الشي ما جاش غير هاكاك. فاللقاء الحزبي اللي دارو الياس العماري هادي اسابيع فمدينة مراكش بدا كلشي. الياس العماري وجه رسائل للدولة. قال بالحرف “للي عندو بومبة ليصانص يجي دير حزب. الحزب ماشي مسائل تجارية” كان كيقصد عزيز اخنوش رئيس التجمع الوطني للاحرار. السيد بحال ايلى عارف اش كان كيتوجد. واخا كلمة بحال ماشي هي الدقيقة فهاد الشي.
داز الوقت ناضو ليه كيف قلنا صحابو حكيم بنشماس رئيس مجلس المستشارين وبنعزوز رئيس فريق البام فنفس المجلس والعربي لمحارشي ومحمد الحموتي عليه وهددوه بين الاستقالة ولا استقالتهم. ثم جات رسالتو لرئيسة المجلس الوطني فاطمة الزهراء المنصوري باش دير تاريخ لمجلس وطني للحزب وهاذا ما تقرر.
فاخر اجتماع للمجلس الوطني الاستثنائي اللي قولب اعضاء الحزب وخصصو للصحرا عوض الحزب وقال “أتمنى خلال 48 ساعة المقبلة أن تحدث تحولات جديدة بخصوص الاختصاصات الجديدة للجهات” وهدد بالاستقالة ايلى ما وقع والو. طبعا ديك الساعة استابق الاعلان عن نشاط ملكي كان مبرمجا مع رؤساء الجهات وكانت عندو الدعوة. الياس العماري بغى يربح سياسيا باش يوقع هاد الاجتماع. غير ان القصر اجل كلشي والسيد ما دارش اللي وعد بيه. غير هو بقى كيقلب اش يدير.
جات هاد الدعوة ديال المقاطعة. تسارعات حقاش لقات قلب لمغاربة طايب على الاسعار. بدات جهات كتستغلها. اللي كان جبد بومبا ليصانص خدم وتحرك وناسو تحركات. لدرجة ان جريدتو اللي مازالت فالحياة٬ خرجات واحد الاشاعة مثيرة. قالت باللي عزيز اخنوش وزير الفلاحة والصيد البحري رئيس التجمع الوطني للاحرار تمنع الخميس الماضي من دخول مقر الاتحاد المغربي للشغل فكازا. المصيبة ان اخنوش والصحافيين شاهدين لانهم كانو فالتغطية ديال معرض الفلاحة بمكناس انو كان تماك وفالعشية تم توزيع جوائز مع الخمسة وهاد الشي كلشي شافوه.
خبار بحال هادا فهاد الوقت عندو اكثر من دلالة. كتبين دورو فهاد الشي.
الياس العماري كيقول للدولة راه غير انا اللي قادر نواجه الاسلاميين. انا بوحدي وراه ماشي غير جي وتخلاي علي.
هاد المسلسل غادي نشوفو واش نهايتو قربات ولا غادي يتزاد شي موسم جديد.