كان كيلعب بيه وجاب الربحة.. راجل سرط ساروت الطوموبيل وهزوه لسبيطار

سعودي في عمرو 40 عام كان كيلعب بساروت ديال طوموبيل وسرطو بالخطأ، أو صدق واحل ليه فالجهاز التنفسي، ومشا لصبيطار باش يعتقوه.
وزارة الصحة السعودية أكدات أن الفرق الطبية قدرات تعتق هاد الراجل لي كانت حالتو خطيرة ملي وصل لقسم الطوارئ وهو مقادرش حتا يتنفس، ديك ساعة دارو ليه الفحص السريري والأشعة، ولقاو ساروت ديال طوموبيل واحل ليه فالقصبة الهوائية.
هادشي تسبب ليه فاختناق جزئي، وكان ضروري خاص تدخل جراحي عن طريق المنظار باش يحيدو ساروت.
طبيب دار ليه العملية بالزربة مفاتش فيها 15 دقيقة، ومن بعد حولوه لقسم التنويم حتا تستقر حالتو الصحية.