بودريقة: خسرنا 200 مليون بسبب احداث فينال كأس العرش.. وإذا الرجاء خسرات حنا المسؤولين والمظلومية والمؤامرة ما كايناش وخاص احترام الجامعة ولقجع

كشف محمد بودريقة رئيس الرجاء الرياضي أن النادي خسر مبلغ 200 مليون سنتيم، بسبب أحداث الشغب اللي وقعت فماتش فينال كأس العرش بالرباط السبت الماضي، وحذر من تكرار مثل هذه الأحداث والتأثير ديالها على صورة النادي.
وتحدث محمد بودريقة فلقاء مع جماهير الرجاء من خلال الصفحة الرسمية للنادي وقال: "كان عندنا مستشهر فكاس العرب وكان عطينا مبلغ كبير القيمة ديالو أكثر من 200 مليون سنتيم فثلاث مباريات، وكان غيتوقع العقد يوم الاثنين الماضي، ومن بعد الأحداث اللي وقعت فالفينال د كأس العرش السبت الماضي، فالمستشهر ملي سمع هذا الشي تراجع باش يعطينا هذا الصفقة".
وكمل محمد بودريقة وقال: "حنا تفهمنا المستشهر، حيث ما كاينش شي واحد كيبغي يربط الاسم ديالو بالشغب ولو انك تشرح له بلي مندسين وسط الجماهير والمحسوبين هم اللي دارو هذا الأحداث، وبغينا جمهورنا يكون ذكي حيث بالفعل جمهور الرجاء هو جمهور ذكي باش مستقبلا مثل هذه التصرفات غير الرياضية، واللي ما كتليقش باسم الرجاء لا تتكرر".
محمد بودريقة وجه ميساج للجماهير د الرجاء وقالهم: "حنا اليوم بلاعبين الرجاء وتقنيينه وادارييه غنديرو كلشي اللي علينا باش الفريق يرجع للسكة ديالو الصحيحة، ويكون بحلة جديدة، ولكن خاص الجمهور يدعمنا ويساندنا، والدعم هو الابتعاد عن الشغب وصورة الفريق تبقى ديما مزيانة وممتازة".
واكد بودريقة، على ضرورة احترام المؤسسات والمسؤولين ديالها، وفمقدمتها الجامعة الملكية المغربية لكرة القدم ورئيسها فوزي لقجع، وأكد أن فريق الرجاء إذا خسر راه المسؤولين ديالو بمن فيهم هو كرئيس، واللاعبين والتقنيين فيه اللي كيتحملو المسؤولية، ماشي شي حد آخر، وأنه ما كاين لا مظلومية لا والو.
وتحدث رئيس الرجاء مع الجماهير الرجاوية من خلال الصفحة الرسمية د النادي وقال: "يجب احترام المؤسسات وهنا كنخص بالذكر الجامعة الملكية المغربية لكرة القدم ورئيسها فوزي لقجع وأعضاء الجامعة، راه كنعرفو الدور الكبير اللي داروه فتطورير الكرة المغربية وتطوير الأندية المغربية"
وبخصوص ما يروج وسط جماهير الرجاء عن أن الفريق مظلوم، قال بودريقة: "ما يمكنش نتكلمو بأشياء غير صحيحة وغير موجودة، وخصوصا وأن بعض مكونات الرجاء دائما كتكلم على المظلومية وأن هناك أشياء تحاك ضد النادي، و حنا إذا كنا انهزمنا فمناسبات او مباريات راه خاصنا نتحملو المسؤولية كمسؤولين ولاعبين وطاقم تقني ونقولو حنا خسرنا بكل روح رياضية".
بودريقة شكر كذلك سلطات مدينة الرباط على تأمينها ماتش فينال كأس العرش بين الرجاء الرياضي ونهضة بركان السبت الماضي فتيران مولاي عبد الله بالرباط، وقال: كنشكر سلطات الرباط والوالي اليعقوبي على المجهودات الكبيرة اللي قام بها يوم الماتش، التواصل اللي كان خصوصا وأن الجماهير بدات كتجي مع 8 الصباح للتيران، وكنتأسفو على الأحداث اللي وقعت وكنشكرو الجامعة على الدور الكبير اللي قامت به لتأمين هذه المباراة، نتمناو مستقبل زاهر للرجاء والكرة المغربية".
وشدد بودريقة وقال: "اليوم جميع مكونات الرجاء تؤكد على احترام القانون والمؤسسات، أما التصرفات الغير مسؤولة أو الشغب فهي لا تمت للرياضة ولا للروح الرياضية بصلة".