بوجنوي او كيفاش مديرة مالية ولات "رب" دوزيم". كلشي يخاف منها وراسلة صحابها فالادارة لمونديال استراليا طالع للقناة ب15 مليون باش يدير السياحة

ما كاينة حتى فشي قناة فالعالم. سابقة فكاع التلفزيونات ديال الكرة الارضية. مديرة مالية كتبان فكاع البرامج. كيجيبوها ف"الصباحيات" فنشرات الاخبار بقى ليها غير النشرة الجوية اللي ما دازتش فيهم. هاد الشي كاين ف"دوزيم". دابا كلشي كيخاف من خديجة بوجنوي. خايف يتضرب ايلى قرب منها. دارت شي احتيال ديال المناصفة والتنوع بالقناة وولات خدامة بيها. تخربيقة حقاش عدد كبير من الصحافيات تعرضو فهاد القناة للتحرش للتضييق وهاد الشي فراس كلشي وما عمر شي حد قال خاصنا نهدرو عليه. وقع البارح كيفاش نديرو ما عمرو يتكرر.
اذن هاد المناصفة ما عمرها تكون بلا ما يتفتحو ملفات ماشي قديمة بزاف.
ما علينا علاش جبدنا هاد "بوجنوي" هو انها رسلات مدير فالقناة لاستراليا. هاد المدير ديال الماركوتينك. ما عندو ما يدير. مقيل الليل وما طال مع العصابة ديال "الفرقة" ديك لفضيحة الاخرى اللي دارتها قناة كانت مرجع فتغطية الانشطة العالمية وولات شوهة مغربية.
هاد المدير طالع عليها حسب ما تسرب من "دوزيم" وحصلات عليه "كود" بشي 15 مليون. هاد الشي يقدر يكون كثر.
لالة بوجنوي كيتحكم بالسيف فهاد القناة. دارت رباعة دايرين بيها كيمجدوها.
كيفاش مديرة فاشلة فخدمتها اللي هي الادارة المالية بهاد النفوذ. القناة عندها مشاكل مالية. حتى الصحافيين المتعاونين شي وحدين ما مخلصينش هادي مدة. شوفو الوقاحة فين وصلات.
دوزيم خاصها تغيير. تعطل هاد التغيير. الدولة كتبان ما بقات مسوقة للاعلام العمومي. لعرايشي فيصل باطرون الشركة الوطنية للاذاعة والتلفزيون حتى هو غادي يحتافل فعيد العرش ب23 عام وهو مدير ما قرب ليه حد. سليم الشيخ مدير "دوزيم" طول فهاد القناة ماشي بحال لعرايشي ولكن جا الوقت يجيبو مدير جديد يكون ولد الميدان وعندو عقل ينتج الافكار.
ظهور امثال بوجنوي كيخلع. كاينة شي حاجة ماشي تا لهيه فالبلاد كلها.