باش تفهمو علاش الاولى" هانت "دوزيم" فلقاء رئيس الحكومة. قناة عين السبع غادية تولي تابعة للشركة الوطنية للاذاعة والتلفزيون من خلال هولدينگ كبير. لفضيحة كيفاش هاد الدولة غادية تعطي للعرايشي قناة فيها الحياة بعد ما قتل للي عندو ودوز عشرين عام فبلاصتو

البارح كانت ضربة خايبة ل"دوزيم". ضربة لقناة تحركات وكتحرك حسن من باقي القنوات. طبعا فالمغرب ما كنستغربوش من هاد الشي. اللي كيدير مجهود كيكون تحت الاضواء وكياكل لعصا.
عوض ما يجيبو صحافيين ف"دوزيم" فيديهم وكاينين ولكن ماشي هاداك "سيدي خالد" ديال صلاح الدين الغماري٬ ناض رئيس حكومة ما فيدوش عيان ضعيف ماشي غير فالتواصل وفرض على قنوات "دوزيم" و"الاولى" و"ميدي 1 تيفي" يديرو ليه حوار. متوقع مع بنعرفة واخا هاد الشي ما غاديش يدير نسبة مهمة من المتابعة. غادي يهرب المغاربة اللي اصلا ما كيطربهمش اي ما كيتسوقوش لهدرتو.
وباش تكمل الباهية جابو صحافية من الاولى دير الحوار. صحافية باش كتقدم لخبار كتجيب ليك النعاس. من مدرسة العصر الحجزي فالتلفزيون.
هاد الضربة ماشي مجانية. فيها رسالة. باش تفهموها كاين خبار داز هادي ايام قليلة. فحسب عدد شهر ماي 2020 من مجلة « ايكونومي إ انتروربيز » فانه بناء على تقرير المجلس الاعلى للحسابات قطب السمعي البصري العمومي فان هناك تقارب بين « دوزيم » و »الشركة الوطنية للاذاعة والتلفزيون » باش يخلقو هولدينگ يجمع القنوات العمومية بما فيها « دوزيم » ووفق المجلة فهاد المشروع كيتسنى يوافقو عليه السلطات المختصة.
هاد المشروع فيه وفق المجلة ٬ « تدخل الشركة الوطنية للاذاعة والتلفزيون فكابيطال دوزيم وتاخد كاع الكونطرول. تتحكم فكلشي.
للي ما معروفش الدولة عندها ف »دوزيم » 76 بالمائة غادي يبقى 24 بالمائة ديال الخواص اش يديرو بيها.
الشركة الوطنية للاذاعة والتلفزيون كتاخذ الدعم من خلال هاديك الضريبة ديال السمعي البصري اللي كيخص المواطن ففاكتورة الضو كتجيها 1.5 مليار درهم ويالله 200 مليون درهم دالاشهار دخلاتها وفق المجلة نفسها ف2017 بينما دوزيم فالخسران هادي 12 عام كل عام كتخسر 100 مليون درهم.
هادي اهانة لكاع ناس دوزيم. الدولة لعبات دور باش تبقى تخسر. وكملاتها باش خلات مدير الريجي اللي مكلفة بالاشهار مدير قناة اخرى هي "ميدي 1 تي في". ما كاينة كاع فالعالم.
دابا واش من نيتهم يكون فيصل لعرايشي اللي قدو قد فترة حكم محمد السادس٬ يدير قناة فهاد القرن. قناة بعد مغرب كورونا فيروس. العالم كولو غادي يعيش تحولات عميقة بزاف وحنا حالفين حتى نرجعو كاع قنوات المغرب بحال قنوات لعرايشي اللي سنوات وهي كيتجري على المشاهدين. فضيحة وصافي.