“ام بي سي 5″ غادية وتتمدد. كيفاش المغرب كيقتل ف”دوزيم” لصالح السواعدة وها هجومهم فرمضان الجاي وها الحروب اللي نايضة الفوق على هاد المد

القناة السعودية “ام بي سي 5” اللي خصصوها لدول المغرب عندها استراتيجية واضحة. تشد سوق المتابعة اولا فالدول المغاربية وطبعا منها المغرب ومن بعد تشد سوق الاشهارات. وفق ما علمته “كود” فان برمجتها فرمضان اللي جاي وجدات تقريبا. “غادية توظف كلشي باش تشد السوق. سوق المتابعة اولا ثم سوق الاشهار ثانيا” يشرح مصدر ل”كود”. برمجة فيها بجال برمجة “دوزيم” و”الاولى” ولكن بامكانيات مضاعفة. يعني حتى شي قناة من قنواتنا غادية تقدر تواجهها.
هاد الشي داخل فاستراتيجية كبيرة ديال نظام محمد بن سلمان توجههو الجديد. بوق ولكن مقاد ومصايب بحرفية. بالنسبة ل”دوزيم” حسب ما علمات “كود”٬ ما خايفاش من هاد المد. عارفة باللي كاينة الامكانيات ولكن عندها الاسلحة ديالها باش تواجه منافسين بحال “ام بي سي”. دوزيم وفق مصدر “كود” جاهزة واخا ماديا ضعيفة. ادريس جطو رئيس المجلس الاعلى للحسابات هدر اكثر من مرة اخرها البارح فالبرلمان بللي خاص الامكانيات للقناة باش دير خدمة عمومية. تقريرو السابق كان هدر على تناقضات فهاد الشي.
ولكن هاد الهجوم ديال السواعدة على المغرب عبر “الام بي سي” راه نوض انقسام الفوق. فيصل لعرايشي الرئيس المدير العام للشركة الوطنية للاذاعة والتلفزيون ضد هاد التمدد. عارف انعكاسات هاد الشي على سوق الاعلانات اللي اصلا مخنوق فالبلاد وغادي اللاور اللاور. غير هو صوتو ما مسموعش دابا حقاش كاينة جهات باغية تستافد ماديا من هاد القتاة. وفق مصدر “كود” فان مالين القناة مشاو عند عدد من الشركات باش يتكلفو بالاشهار فالسوق المغربية. شي وحدين رفضو يشرح مصدر “كود”. دارو ليهم كيف دارت بعض شركات الانتاج. شي شركة قبلات وهاد الشركة عندها ارتباط بشخصية مشهورة فالبلاد. بالنسبة ليها هاد الشي بيزنس وصافي.
الدولة منقسمة مع هاد الشي. عارفة راسها ما تقدرش تواجه المنافسة الا بقنوات قوية للقطب العمومي فغياب قنوات خاصة. يالله بدات شي تجارب ولكن باقية فتية بزاف.
دابا مواجهة المد السعودي فالمغرب مسؤولية الدولة. الدولة دارت كلشي باش القنوات يكون حالهم مقود بحال اللي عليه اليوم. خاص قرار سياسي من الفوق باش نوصلو شي نهار اولا لتقديم خدمة عمومية وثانيا للاستمرار فالسيطرة على سوق المشاهدة فالمغرب.