رمزي: ظروف الوداد صعيبة.. الماتش ضد أهلي طرابلس حاسم وغندخلوه باش نديرو نيفو مزيان ونربحو

اعتبر عادل رمزي مدرب الوداد الرياضي ان ماتش الفريق غدا الاحد ضد أهلي طرابلس الليبي، برسم الجولة الثانية من كاس العرب المقامة بالسعودية، هو أهم ماتش وانه حاسم بعد التعادل فالجولة الاولى، وأكد ان الفريق الاحمر غيدخل ضد الليبيين يقدم مستوى أحسن ونتيجة إيجابية.
وتحدث عادل رمزي خلال الندوة الصحافية اللي كتسبق ماتش الوداد الرياضي وأهلي طرابلس الليبي، وقال: "المواجهة الثانية فكاس العرب اللي غتكون مع أهلي طرابلس الليبي، بالنسبة للفريقين والجولة الثانية مهمة للفرقة بأربعة ديال هذه المجموعة بعدما خرجو كاملين تعادل فالجولة الاولى"
وكمل مدرب الوداد: "حنا واعيين بالمسؤولية اللي علينا، الظروف د الماتش الاول كانت صعيبة حاولنا فيها نفردو طريقة اللعب ديالنا ولكن الطرد ديال جبران غير لنا الحسابات، وحاولنا بعدها تخرجو على الاقل بنقطة واحدة وراه مرتاحين لها"
وشدد عادل الرمزي: "غنحاولو فالماتش الثاني نقدمو المستوى اللي كينتظر منا الجمهور واللي كنتسناوه حتى حنا من ريوسنا، وللاشارة حنا راه فتطور والظروف ديال الوداد صعيبة حيث المدرب التحق 9 ايام وكاينين لاعبين جداد، ولكن حنا واعيين بالمسؤولية وكنتمنى نقدمو مستوى احسن اما اهلي طرابلس ونحقق نتيجة إيجابية".