بحال العيالات بحال الرجال.. المغرب يبهر العالم بإنجاز تاريخي جديد واللبؤات يتأهلن إلى ثمن مونديال السيدات

كيواصل المغرب تحقيق الإنجازات التاريخية فالكرة العالمية، وهذه المرة من خلال المنتخب الوطني المغربي للسيدات، اللي حقق إنجاز تاريخي غير مسبوق عربيا ونادرا ما كيوقع إفريقيا بالتأهل إلى ثمن نهائي كأس العالم للعيالات 2023، بأستراليا ونيوزيلندا، بعدما ربح منتخب كولومبيا اليوم الخميس بأستراليا، ضمن الجولة الثالثة والأخيرة من دور المجموعات، وهذا الشي بعد أشهر قليلة على إنجاز المنتخب المغربي للرجال بالوصول إلى نصف نهائي مونديال 2022 بقطر.
وربح المنتخب المغربي منتخب كولومبيا بواحد لزيرو من ماركاتو النجمة المغربية أنيسة الحماري مع نهاة الشوط الاول، من كرة مرتدة من حارسة مرمى كولومبيا، اللي حبست ضربة جزاء سددتها الكابيتان المغربية غزلان الشباك، وهي ضربة جزاء جابتها المهاجمة ابتسام الجرايدي بعدما طيحتها مدافعة كولومبيا وسط مربع العمليات.
ودارت اللاعبات المغربيات ماتش كبير سوا دفاعيا أو هجوميا أمام أن الكولومبيات، لدرجة أن المنتخب المغربي هو اللي خذا المبادرة وبشجاعة منذ بداية المباراة وخلق فرص، وراه كان توازن بين الخطوط ديالو هجوميا ودفاعيا، لتفادي شي مفاجأة من كولومبيا، اللي مرة مرة كيضغطو ولكن الاستماتة ديال حارسة المرمى المغربية خديجة الرميشي والمدافعات المغربيات خلات النتيجة لمصلحة ليكيب ناسيونال حتى سالا الماتش.
واستغل المنتخب المغربي، نتيجة ماتش الاخر عن نفس المجموعة، بين كوريا الجنوبية ومنتخب ألمانيا، اللي سالا بالتعادل الإيجابي واحد لواحد، وكانت الكوريات متقدمات فالنتيجة بهدف ماركاتو اللاعبة تشو سو هيون فالدقيقة 6، وتسناو الألمانيات حتى اللحظات الأخيرة من الشوط الأول باش يماركيو التعادل بهدف ديال الهدافة والكابيتان أليكسندرا بوب، اللي رجعت ماركات فالشوط الثاني هدف وحيدو "الفار" بداعي التسلل، وضربت كرة أخرى بالعارضة.
وتأهل المنتخب المغربي إلى ثمن نهائي كأس العالم للعيالات لأول مرة فالتاريخ ديالو، ومن أول مشاركة، بعدما احتل المركز الثاني بالمجموعة H، برصيد 6 النقاط جمعها من 2 ربحات وخسارة، وغيلعب فالدومي فينال مع منتخب فرنسا الخميس الجاي، اللي تصدر المجموعة F، وراه كيدربو الناخب الوطني السابق المنتخب المغربي للرجال الفرنسي هيرفي رونار، أما كولومبيا تصدرت المجموعة بفارق النسبة الخاصة عن المنتخب المغربي وغتلعب فالدومي فينال مع جاميكا، وألمانيا بطلة العالم 2003 و 2007، وبطلة أوروبا، تقصات من الدور الأول فواحدة من مفاجأت هذا المونديال، وودعت البطولة هي وكوريا الجنوبية.