المنتخب المغربي النسوي طاح طيحة خايبة فأول مشاركة له فكأس العالم للسيدات وخسر بسداسية مع ألمانيا

خسر المنتخب المغربي النسوي أمام المنتخب الألماني اليوم الاثنين فتيران المستطيل بملبورن الأسترالية، ضمن أول جولة من دور مجموعات مونديال استراليا ونيوزيلندا 2023.
وسالا الماتش بين المنتخب المغربي والمنتخب الألماني، بخسارة كبيرة للاعبات المغربيات، حيث الألمانيات نجحن فتسجيل 6 أهداف فالماتش، اللي كان صعيب بزاف على المنتخب المغربي اللي مشارك لأول مرة فتاريخو فالمونديال، وبان فرق التجربة.
وسالا الشوط الأول بين المنتخب المغربي ومنتخب ألمانيا بنتجية 2 لزيرو لمصلحة الألمانيات، وهو الهدف اللي ماركاتو الكابيتان د ألمانيا أليكسندرة بوب في الدقيقة 11، بعد هفوة قاتلة ديال دفاع المنتخب المغربي سالات برأسية المهاجمة الألمانية فمرمى المغربيات، ورجعت أليكسندرة بوب وماركات الهدف الثاني لألمانيا فالدقيقة 39، ومرة أخرى سجلت بالرأس واستغلت خطأ فالتغطية ديال المدافعات المغربيات.
وفالشوط الثاني دخل المنتخب الألماني مجهد وبالمقابل كانت لاعبات المنتخب المغربي تالفات فالتيران، وقدرو الألمانيات يماركيو 4 أهداف أخرى، وسجلت كلارا بوهل الهدف الثالث فالدقيقة 46، وحنان أيت الحاج ماركات على رأسها فالدقيقة 54، وأسماء المرابط حتى هي ماركات على راسها فالدقيقة 79، وزادت ليا شاوليري الهدف السادس فالدقيقة 90، وهذه هي أكبر نتيجة إلى حدود الآن فهذه النسخة من كأس العالم، وكانت النتيجة تقدر تكون كبر لولا التسلل والفار.
وبهذه النتيجة تصدر المنتخب الألماني بطل العالم 2 مرات، (تصدر) لكروب 8 برصيد 3 نقاط، والمنتخب المغربي كيحتل المركز الأخير برصيد 0 نقطة، فانتظار التعرف على نتيجة ماتش كوريا الجنوبية ضد كولومبيا، عن نفس المجموعة.
المنتخب المغربي بقيادة المدرب رينالد بيدروس مطالب بمراجعة المستوى ديالو، إذا بغاو يحققو التأهل للدور الجاي، أو على الأقل يبانو بمستوى مشرف خلال الجوج ماتشات اللي جايين ضد كل من كوريا الجنوبية وكولومبيا فالجولة الثانية والثالثة، من دور مجموعات كأس العالم.