طمع إشبيلة مصعب انتقال ياسين بونو لريال مدريد ومسؤوليه طلعو الثمن ملي بدات المفاوضات

كيصعب إشبيلة الإسباني فريق النجم المغربي ياسين بونو انتقال الأخير إلى أي فريق جديد هذا الميركاتو الصيفي، ودابا جات نوبة ريال مدريد الإسباني اللي باغي يربح الصفقة، بعدما عجز بايرن ميونيخ الألماني خلال الأيام الماضية بسبب مطالب مسؤولين إشبيلة.
وكشفت شبكة ESPN الإسبانية، أنه بالفعل ريال مدريد دخل كيفاوض إشبيلة على ياسين بونو، وأن رئيس ريال مدريد فلورينتينو بريز دوا مع رئيس إشبيلية خوسي كاستور، ولكن كاين مشكل حيث الفريق الأندلسي باغي يستغل رغبة فريق كبيرة بقيمة ريال مدريد فالتعاقد مع بونو ويطلع ثمن بيع العقد ديالو.
وحسب نفس المصدر، فرئيس إشبيلة باغ أكثر من 30 مليون أورو مقابل التنازل عن خدمات ياسين بونو، وراه قالها لفلورنتينو بيريس رئيس ريال مدريد، والأخير كيحاول ينزل من الثمن حيث بالفعل المدريديستا باغيين ياسين بونو، ولكن راه عندهم خيارات أخرى الكول الإسباني دافيد ديخيا، إذا فشلت صفقة المغربي بونو.
كيتبين من خلال معلومات القناة الإسبانية، أن المسؤولين ديال إشبيلة الإسباني طماعين، وخواو ياسين بونو ملي سمعو أن ريال مدريد هو اللي باغي يتعاقد مع الكول المغربي، حيث كان فالشرط الجزائي بين بونو إشبيلة 50 مليون أورو، واتفق النجم المغربي والفريق الأندلسي مدة هادي على تخفيض قيمة الشرط إلى 20 مليون أورو، وهذا هو الثمن اللي كان كينيكوسي به الفريق الإسباني مع بايرن ميونيخ الألماني قبل أيام، وملي دخل ريال مدريد على الخط طلعو إشبيلية الثمن إلى 30 مليون أورو.