بونو والنصيري باغيين يبدلو إشبيلة بما أحسن وما غراتهمش عروض السعودية والفريق الأندلسيناوي يدخل معهم الملايين

باغي كل من الدوليين المغربيين ياسين بونو ويوسف النصيري يمشيو من إشبيلية الإسباني، ولكن إلى فريق أحسن وعندو طموحات أكبر، وحتى الفريق الأندلسي باغي يستغل القيمة ديال اللاعبين باش يدخل فلوس هاد الميركاتو ويقدر يعزز الصفوف ديالو استعدادا للموسم الجاي.
وحسب جريدة "أس" الإسبانية، فكل من الكول المغربي ياسين بونو والمواطن ديالو المهاجم يوسف النصيري، موافقين أنهما يمشيو من إشبيلية، ولكن بشرط الانتقال إلى فرق عندها نفس التطلعات الرياضية وحسن من إشبيلية.
أما بخصوص إشبيلية فأكدت الجريدة الإسبانية، أن المسؤولين د الفريق الأندلسي واضحين بالنسبة للقيمة المالية اللي باغيين ياخذوها مقابل التنازل عن خدمات ياسين بونو ويوسف النصيري، وما غينزلوش على 60 مليون أورو مقابل التخلي على النجمين المغربيين.
وبالنسبة لياسين بونو، أشار نفس المصدر إلى أن النجم المغربي اللي كتبلغ القيمة السوقية ديالو دابا تقريبا 20 مليون أورو، جاوه 2 د العروض من السعودية ولكن رفضهم حيث باغي يكمل اللعب بأوروبا فنيفو كبير، وحتى الأندية الأوروبية الكبير راه باغياه بحال انتر ميلان الإيطالي وبايرن ميونيخ الألماني، وراه إشبيلية كيتسناو شي عرض للحارس المغربي فالأيام المقبلة.
وعن يوسف النصيري، فالمهاجم المغربي وبعدما كان متردد فالرحيل على إشبيلية خلال المرحلة الماضية، وضحت الجريدة الاسبانية، أنه أصبح عارف بلي دابا فرصة مزيانة باش يبدل الفريق الأندلسي بما أحسن، وحتى 16 هدف اللي ماركا فمدة 5 أشهر من يناير لماي، رجعاتو مرة أخرى لواجهة الساحة العالمية، واشبيلية كان باغي يتنازل على الخدمات ديالو خلال الميركاتو الشتوي الماضي مقابل 20 مليون أورو، ولكن دابا باغي الدوبل، وحتى هو جاوه عروض من السعودية ولكن باغي يلعب مع فريق كينافس على دوري أبطال أوروبا.