فحالة تأكد اللقاء.. بأي صفة غادي يستقبل أنطونيو گوتيريش زعيم البوليساريو ؟

Elouali.zaz.1987@gmail.com
تداولت عدة مصادر تقارير حول لقاء مرتقب بين الأمين العام للأمم المتحدة، أنطونيو گوتيريش، وزعيم جبهة البوليساريو، إبراهيم غالي، يوم الإثنين المقبل الموافق لتاريخ 11 شتنبر 2023، دون أن يتم الإعلان عنه رسميا لا من طرف جبهة البوليساريو ولا من طرف الأمانة العامة للأمم المتحدة.
ما عليناش.. اللقاء ممكن يكون ولكن بتحفظ وبتشاور مع المغرب، لأن الإستقبال ممكن تكون عليه ردة فعل مغربية ومن حق المغرب يدير ردة فعل، علما بأن گوتيريش وابراهيم غالي ديجا تلاقاو واخا كان لقاء غير رسمي، وغادي نرجعو لموضوع اللقاءات بينهم والمحطات لي كانت عاصفة بينهم فموضوع لاحق.
موضوعنا دابا عندو علاقة وإنعكاس مباشر على النزاع والموقف الذي تتبناه الأمم المتحدة ولي كيفرض عليها الحياد والوقوف مسافة واحد على أصحاب المصلحة، وكيتعلق بالصفة لي غادي يستقبلو بيها.
باش ما يغمقش علينا إعلام العسكر ووأتباعو فاللقاء إذا تم بالفعل، فراه ما غاديش يكون بهاديك الصفة لي كيحلمو بيها، وغادي يكون بصفة الأمين العام لجبهة البوليساريو وهي الصفة لي كتقدم بيها الأمم المتحدة ومجلس الأمن الدولي البوليساريو دائما سواء فالقرارات أو تقارير الأمانة العامة.
هاد الصفة ديال الأمين العام لجبهة البوليساريو واضح علاش غادي تكون فالتقديم، وببساطة لأن البوليساريو عمرها كانت دولة فنظر الأمم المتحدة لي ترعى حصريا النزاع ومشرفة عليه 50 عام هادي، ولا عمرها كانت عندها عضوية ديال الأمم المتحدة.