مقرب من الوزير بنموسى ل"كود": المدارس اللي تضرات بالزلزال غادي تسد باش تعاود تصلح من جديد ودبا كنشوفو حلول مؤقتة باش التلاميذ يستمروا فالدراسة ديالهوم

قال مصدر مقرب من شكيب بنموسى، وزير التربية الوطنية والرياضة والتعليم الأولي، في تصريح ل"كود"، أن جميع المؤسسات المتواجدة بالمناطق المتضررة من الزلزال توقفات فيها لقراية اليوم السبت.
وكشف المصدر أن المصالح المختصة بالأكاديمية الجهوية للتربية والتكوين دايرة دبا خدمتها باش تعرف شنو هوما المدارس اللي خاصها تغلق يوم الإثنين المقبل لكي لا تشكل خطرا على سلامة التلاميذ والأطر التربوية والإدارية.
وأضاف المصدر أن الوزارة الوصية على القطاع لن تغامر بسلامة التلاميذ، موضحا أن المصالح المختصة تعمل حاليا على تقييم لبلايص اللي فيها الخطر باش تدير الإجراءات والتدابير اللازمة فهاد الإطار.
وذكر أن المديريات الإقليمية والأكاديميات الجهوية للتربية والتكوين دايرة عمل كبير لمواكبة آخر التطورات اللي كاينة على الزلزال الذي خلف مئات القتلى، بالإضافة إلى أضرار مادية جسيمة، مؤكدا أن المدارس اللي وقع فيه الزلزال او فيها شي شروخات خاصهوم شويا ديال الوقت لإعادة تأهيلها من جديد.
وتابع المصدر نفسه أنه غادي يكون حتى الدعم النفسي والمعنوي للتلاميذ وأوليائهم في المناطق المتضررة من الزلزال، مؤكدا أن المدارس اللي تقاصت بالزلزال غادي تسد واللي مافيهاش أضرار كبيرة غادي تصلح في أقرب وقت.
وعلى المستوى المحلي، حسب ذات المصدر، يتم البحث حاليا عن حلول مؤقتة حقاش تأهيل المدارس غادي ياخد الوقت باش التلاميذ يستمرو فالدراسة ديالهوم، مؤكدا أن هناك عمل ميداني بتنسيق مع السلطات المحلية باش يكون تصور مشترك فيه مصلحة للجميع.