الركراكي: ما كانش ساهل علينا نلعبو ماتش بوركينافاسو حيث بالنا كان مع ضحايا الحوز.. ربحنا على قبل الشعب ونأكدو أن المغرب ما كيوقفش وغايزيد للقدام وغندخلو لبلادنا نعاونو

أكد الناخب الوطني وليد الركراكي أن مكونات المنتخب المغربي كتعيش أجواء الحزن والحداد بحالها بحال جميع المغاربة، بسبب صدمة زلزال الحوز اللي خطف أرواح كثر من 2900 واحد وطيح كثر من 5000 مصاب، وأنه كان ضروري من الرباح، حيث المغرب ما كيوقفش وديما غيزيد للقدام واخا يوقع اللي وقع.
وتحدث الناخب الوطني وليد الركراكي فتصريح بعدما ربح المنتخب المغربي بوركينافاسو بواحد لزيرو فماتش أميكال هاد العشية ففرنسا، وقال: "ما كانش ساهل علينا نوجدو لهذا الماتش، ولكن كان خاصنا نلعبو على قبل الشعب المغربي باش تعطيوهم شوية الفرحة، وهذا الشي اللي قلت للدراري خاصنا نربحو وتكون لامانيير".
وزاد كشف الركراكي على الأجواء داخل المنتخب المغربي بسبب الفاجعة، وقال: "حنا متأثرين، مع ضحايا الزلزال اللي ماتو واللي مبليسين واللي مازال ما جبدوهمش والقلوب ديالنا معهم.. درنا اللي علينا اليوم باش نقدرو نلعبو الكرة اللي كنعرفو وهذا الشي ما كانش ساهل وما فكرنا لا فغيابات لا والو حيث راسنا عامر غير بالمغرب، وكنقولو شكرا للمغاربة كاملين وفهاد الظروف كنبانو شعب كبير، حيث ملي كنتعذبو كنتعاونو وأي مغربي اما فالبلاد اما على برا باغي يعاون وهذا الشي كيجمعنا".
وأكد وليد الركراكي: "الكرة اليوم ما كانتش مهمة بالحق ما بغيناش نخسرو على قبل ضحايا الفاجعة، وما بغيتش نهضر على الكرة واللي مهم هو درنا الخدمة ديالنا وفرحنا هاد الناس اللي جاو من أوروبا كاملة او من المغرب، ودابا حتى حنا دغيا غندخلو للمغرب باش نعاونو، ومن بعد نفكرو فالماتشات اللي جايين، والكرة ما هي والو نتعاونو وندعيو مع هاد الناس".
وشدد وليد الركراكي مدرب المنتخب المغربي فميساج قوي، وقال: "خاصك تكون فرحان حيث انت مغربي وماشي غير تكون فرحان راه خاصك تفتخر، ملي كتشوف شي حاجة قاصتنا كنتعاونو عندنا شعب كبير والمغرب ديما غيبقى كبير واخا اللي يطرا وغنزيدو للقدام، وكان مزيان نلعبو باش نوريو بلي المغرب ما كيوقفش وحنا ما وقفناش اليوم وخا ما كانش هذا الشي ساهل علينا".