ها كيفاش دايرة جامع لفنا بعد 6 أيام من الزلزال.. التجار مزال مصدومين.. وأحدهم ل"كود": الحياة بدات ترجع كيف كانت والسياح كنعديو معاهوم شويا بشويا -فيديو

بعد الزلزال اللي ضرب عدد من لبلايص فمراكش والنواحي وما خلفه من آثار على الاقتصاد والسياحة ديال لمدينة لحمرا، بدات الحياة ترجع تدريجيا كيف شافت "كود" اليوم الأربعاء.
"كود" دارت جولات في ساحة جامع لفنا اللي بانت علامة الصدمة على التجار اللي فيها بسبب الركود اللي خلفو هاد الزلزال، غير أنهم حسو باللي هادشي مرحلة دايزة وبدات الأمور ترجع كيف كانت.
واحد التاجر كيبيع العصير هضرات معاه "كود" وقال: فاش ضرب الزلزال فاليومين الأولى جامع لفنا كانت بحال يلا ضرباتها شي عجاجة والسياح من الداخل خواو مشا بحالهوم لكن السياح الأجانب باقيين كنعديو معاهوم شويا بشويا".
وأضاف: "اليوم الحمد لله شويا ماشي بحال الثلاث الايام اللي فاتت اللي كانت ميتة، والحياة بدات كترجع كيف كانت شحال هادي".