مقرب من الوزير بنموسى ل"كود": إصلاح المدارس فالمناطق المتضررة من الزلزال غادي يكون تدريجي حقاش كاين صعوبات ولقراية مغاديش تحبس وعدد من الأساتذة متأثرين نفسيا

أكد مصدر مقرب من شكيب بنموسى، وزير التربية الوطنية والرياضة والتعليم الأولي، في تصريح ل"كود"، أنه على المستوى المحلي كاين عدد من المؤسسات المتضررة من الزلزال للي ضرب عدد من المناطق.
وأضاف المصدر: "لقينا بعض الحلول للتلاميذ ومنها استمرار الدراسة في بعض المؤسسات التعليمية التي لم تتضرر من الزلزال حيث يتم توزيع التلاميذ عليها باتفاق بطبيعة الحال مع الأسر، وكاين مناطق اللي متضررة بداو إصلاح عدد من الأقسام وحتى تكوين المساعدات الاجتماعيات بدا باش يبداو مباشرة في مصاحبة التلاميذ وموكابتهم".
وأوضح المصدر ذاتو، أن إصلاح هاد المؤسسات التعليمية غادي يكون بطبيعة الحال تدريجي حيث صعيب يتصلح هادشي فدقة وحدة، مسجلا وجود صعوبات في المناطق المتضررة من الزلزال.
كما أشار ذات المصدر إلى أنه كاين إمكانية دبا للأساتذة باش يقريو فبعض المراكز اللي عندنا فيها الإمكانيات باش لقراية تستمر فالمناطق المتضررة، موضحا مرة أخرى، أن هادشي غادي يكون تدريجي حقاش بعض المناطق فيها صعوبات ومعزولة.
وتحدث المصدر المقرب من بنموسى ل"كود" عن إمكانية تدريس التلاميذ في الخيم في المرحلة الراهنة، مؤكدا أن الهدف من هادشي هو التلاميذ ميبقاوش على برا ضايعين بلا قراية.
مصدر "كود" سجل باللي 7 ديال الأساتذة ماتو بسبب الزلزال وما مجموعه 40 ديال الجرحى بين هيئة التدريس، لكن عدد من الأساتذة متأثرين نفسيا جراء هادشي اللي واقع، لاسيما أن عدد منهم كانوا فالدواوير اللي كان فيها الزلزال.
"كاين عملية مع مؤسسة محمد السادس للأعمال الاجتماعية الخاصة بهيئة التدريس لي بطبيعة الحال وفرت دعم صحي للأساتذة سواء اللي مجروحين او اللي ماتو أو للأسر ديالهم لمساعدتهم، وتم تشكيل خلية للدعم النفسي. في نفس الوقت عدد من الأساتذة بغاو حتى هوما ينخاطوا فهاد العملية للتعبير عن تضامنهم مع ضحايا الزلزال". يُضيف المصدر ل"كود".
كما أكد المصدر أن السلطات العمومية والمصالح التابعة لوزارة التربية الوطنية تتواجد في المناطق المتضررة، مشيرا إلى أن هناك فرق تزور جميع المؤسسات التعليمية المتضررة باش تعرف واش ممكن تفتح أو لا حفاظا على سلامة التلاميذ والأطر التربوية والإدارية.
وزاد ذات المصدر: "دبا كاينة خلية مركزية يترأسها الوزير شخصيا ويتابع كل صغيرة وكبيرة وتشتغل باستمرار باش التلاميذ يكملو قرايتهم".