دولة "أساتذة الكونطرا" لي دايرين السيبة فالتعليم.. الوزير بنموسى: كيقولو الادماج أولا عاد نتحاورو ومانعين زيارات المفتشين لي عندهم دور فالجودة والمراقبة والتقييم ديال التدريس وهوما موظفين ديال الدولة

تنسيقية أساتذة الكونطرا، دارت خطأ كبير فحق التلاميذ المغاربة، فحق جودة التعليم، فحسب وزير التربية الوطنية والتعليم الأولي والرياضة، فهاد الاساتذة كيرفضو نهائيا يزوروهم المفتشين، مانعينهم.
هيئة التفتيش، وفق إفادة الوزير، عندها دور كبير فالتكوين والجودة ديال التدريس، كيحطو النقط طبعا ولكن فنفس الوقت كيساهم فجودة التكوين، ومراقبة الجودة ديال التدريس. هاد المفتشين ممنوعين من زيارة اقسام اللي كيقريو فيها اساتذة الكونطرا.
وأوضح بنموسى :"دبا هيئة التفتيش كيمنعوهم اطر الاكاديميات يدخلو للاقسام ديالهم"، مضيفا :"هيئة التفتيش هي لي كادير المصاحبة داخل القسم، وكاين رفض ليهم من طرف اطر الاكاديميات، لأن الهدف هو جودة التدريس، واش هادشي معقول ولا لا واش يمكنا نتنازلو على هادشي، خصوصا هادشي أساسي، وماشي باش نحيو هاد الاساتذة لا راه باش يكون تكوينهم مزيان".
بنموسى بان غضبان فاش هضر على هاد المسألة ديال منع هيئة التفتيش، خصوصا الدور الكبير ديالها. مشددا :"راه ضروري من التقييم والدعم والمراقبة".
وتابع بنموسى :"يلا كان المجتمع كولو باغي الجودة ديال التدريس، والمغاربة باغين يقراو ولادهم، فراه كاينا حقوق وواجبات على الاساتذة ديال الاكاديمية، خصهم يديرو الواجب ديالهم".
وقال الوزير في حديث مع الصحافة اليوم بالرباط، بأن "وجد مشروع لنظام أساسي موحد لجميع موظفي القطاع، من هنا ل 5 أشهر "، مضيفا :"فاش جاو ممثلي موظفي الاكاديميات للوزارة باش يتحاورو، قبل ما يبداو كيقولو الادماج دبا عاد نتحاورو".
وانتقد الوزير طريقة تعامل تنسيقية الاساتذة المتعاقدين مع الحوار لي فتحات الوزارة، مؤكدا أن باب الوزارة مفتوح وانه ممكن يمشي معهم فتحقيق عدد من المطالب.
وشدد الوزير :"موظفي الاكاديميات راهم فالوظيفة العمومية، الدولة لي كتخلصهم".
وقال المصدر نفسه بأن اضراب ما يقارب 25 ألف موظف فالتعليم عندو اثر كبير على جودة التعليم وعلى التدريس، مضيفا :"الاقتطاعات كاينا والاجر مقابل العمل".
وأكد بنموسى أن عدد كبير من المدرسين عندهم اهتمام كبير للمهنة وباغين يخدمو مزيان باش يرفعو جودة التعليم، مشدد بأن ميمكنش نديرو خريطة للاصلاح بدون اشراك للجميع.