المباركي: الماتش كان صعيب ضد الوداد وبرافو للاعبين دالسوالم على النيفو ديالهم ضد فريق كبير بقيمة الواك

أكد بوشعيب المباركي مدرب شباب السوالم ان ماتش الفريق مع الوداد الرياضي، البارح ، ضمن الدورة 3 من البطولة الاحترافية كان صعيب، وأن اللاعبين ديالو دارو مباراة مزيانة واخا خسرو.
وتحدث بوشعيب المباركي فتصريح له بعد خسران السوالم مع الوداد الرياضي بواحد لزيرو، وقال: "كنا عارفين الماتش ما غيكونش ساهل أمام الوداد الرياضي ضد فريق مجرب فيه لاعبين مجربين وكنا عارفين غنلقاو صعوبات كثيرة ولكن ما عليش".
وكمل المباركي وقال: "دبرنا الماتش كيفما بغينا وقدرنا نقللو من خطورة الوداد أغلب فترات الماتش وكان بإمكاننا نفاجئهم فالشوط الثاني فشي هجمات والبوطو ما بغاش، ما عليش ربحنا 2 ماتشات حتى لدابا واليوم خسرنا وغنساو هذا الماتش ونفكرو فاللي جاي".
وأكد المباركي: "أنا راضي على اللاعبين والمجهود اللي قدموه فالماتش، وباش تقدم هذا النيفو أمام فريق اللي كبير راه ماشي ساهل، وراه غياب الجمهور أثر على لاعبين الوداد".