خاص. كو واعر. تزگلنا من دخول مرض خايب للبگر جاي من فرانسا. مصدر مهني ل"كود": براڤو "لونسا" اللي عاقت وحبسات استيراد 100 بگرة ووقفنا استيراد الابقار من فرانسا

علمت "كود" ان "لونسا" =المكتب الوطني للسلامة الصحية للمنتجات الغذائية= وقفات استيراد بگر فرانسا. وقال مصدر مهني ل"كود" باللي احد مستوردي الابقار من الخارج وقفات ليه "لونسا" فميناء الخزيرات٬ استيراد 100 بگرة.
السبب حسب مصدر "كود" هو ان المكتب الوطني للسلامة الصحية ساق لخبار باللي كاين مرض معدي خطير بان ففرانسا كيعطي الحمى للبگر وكيخلي وزنها ينقص بزاف وكيكون عندها صعوبة كبيرة فالتنفس.
واضاف المصدر ل"كود" باللي هاد الشحنة ديال لبگر كانت غادية تطلع للباطو فاتجاه ميناء طنجة المتوسط.
المصدر المهني اكد ل"كود" باللي هاد الخدمة الاستباقية اللي دارت "لونسا" نقدات بلادنا والثروة الحيوانية ديالنا واشاد بهاد الخدمة اللي وصفها بالواعرة.
المصدر اضاف ل"كود" "دابا كون ما عاقتش "لونسا" قبل كون تقولبنا. علاش الفرنسيين ما قالو لينا والو وعلاش خباو لخبار" يستغرب المصدر نفسو