واش بصاح تحالو ولاة امن بني ملال ومراكش ورئيس المصلحة الولائية بنفس لمدينة على التقاعد؟ اللا ما كاين هاد الشي ماكاين وها اللي وقع وكلشي ما عندو حتى شي علاقة بالايادي البيضاء

هاد الصباح دارو الميساجات فاللفايس بخصوص احالة مسؤولين امنيين كبار منهم جوج ولاة امن على التقاعد. الميساج فيه باللي "والي امن مراكش ورئيس المصلحة الولائية للشرطة القضائية احيلا على التقاعد" واخر فيه "اوهاشي والي امن بني ملال الاحالة على التقاعد" و"الكرزازي رئيس منطقة الميناء رئيسا لمنطقة البرنوصي".
حسب مصادر مطلعة ل"كود" فهاد الشي ماشي دقيق. اللي كاين وفق ما علمته "كود" ان سعيد العلوة والي امن مراكش قرب لسن التقاعد. ما كاين لا احالة لا والو٬ بحالو بحال محمد اوهاشي والي امن جهة بني ملال خنيفرة تادلة ولا حتى رئيس المصلحة الولائية للشرطة القضائية بمراكش محسن مكوار، يعني ما كاين حتى شي قرار الاحالة دابا.
حسب ما علمته "كود" فان اللي خرج هاد لخبار بغى يعطي الانطباع باللي هاد الشي عندو علاقة بحملة "الايادي البيضاء". اللي كاين من خلال تحريات "كود" باللي ما كاين حتى شي علاقة لا قريبة ولا بعيدة بهاد الملف.
هاد المسؤولين شي وصل لسن التقاعد فشتنبر وشي قريب بزاف. الادارة العامة للامن الوطني مع عبد اللطيف الحموشي خدامة هادي مدة على التشبيب. يتوقع ان هادوك اللي وصلو للتقاعد ما يبقاوش فالخدمة اي ما يدارش ليهم التمديد. هادا غير توقع. كاين اطر ممكن يدار ليها التمديد.