الولاة الجداد منين جاو وواش يستاحقو المنصب. واخيرا نصفو كازا واكادير ببروفيلات مزيانة وعطاو للداخلة نكرة وكافئو شوراق بسباب الرحامنة وتهلاو فالتازي بطنجة

تعيينات المجلس الوزاري شمل غير 5 جهات صافي. ولاية جهة الدار البيضاء سطات وولاية جهة طنجة تطوان الحسيمة وولاية جهة مراكش اسفي وولاية جهة الداخلة وادي الذهب. كان من المفروض تشمل التعيينات جهات بحال الراشيدية اللي فيها والي جهة ما دار والو لا فهاد الجهة ولا باش كان فالعيون ثم كان ضروري يتغير والي جهة كليميم واد النون. طول بزاف وبلا فايدة ثم حتى حد ما فهم علاش ما مشاش والي فاس مكناس واخا ما خدم والو.
المهم نرجعو للبروفيلات ديال ولاة الجهة ديال الجهات الخمس من اصل 12 شملها التعيين فالمجلس الوزاري ديال ول البارح لخميس 19 اكتوبر 2023.
نبداو باهم جهة فالمغرب وهي جهة الدار البيضاء سطات. هادي ديما مهمشاها الداخلية وكيجيبو ليها ولاة فاشلين كيف وقع مع اخر والي سعيد حميدوش. من نهار وصل وهو مخبي. ما دار للعاصمة الاقتصادية والو. ما كياخدش المبادرة. همو الاول والاخير ما يشوفو حد. كان العقار واقف وما عمرو قدر يتحكم بمدير الوكالة الحضرية اللي كيتحرك غير باوامر وزير الداخلية.
حميدوش كان خطأ فالكاستين. اليوم جابو بروفيل اخر. جابو اكثر الولاة خبرة فالمغرب اليوم اللي هو محمد مهيدية. خبر٬ فالحياة 69 سنة٬ وفالمهنة. هاد المهندس خريج المدرسة العليا للمعادن بفرانسا والمعهد العالي للاسمنت المسلح فمارسيليا دوز عامل فتمارة. دوز بعدها والي بمراكش ثم وجدة فطنجة. اي دوز مع التعيين الجديد فكازا تقريبا نص جهات لبلاد 12. 5 من 12. تعطيه هاد الا. دوز جهة مراكش وبعدها الجهة الشرقية وبعدها جهة الرباط فجهة طنجة تطوان ودابا فجهة كازا
معروف بصرامتو وشخصيتو القوية. ديما لابس الصباط وكيدور. شفناه كيفاش دار لمافيا العقار فطنجة. كان كيتحرك بيدو. دار التيران. وقف فضايح ودار قضية ما عمرها دارت. حيد الرخص لمجلس جهة طنجة بعد تورط اعضاءها ففضايح تعميرية كبيرة.
هاد الوالي مزيان لكازا. غادي يحرك الامور غير خاصو يحضي من اللوبيات الخطيرة والحيتان لكبيرة اللي كتحرك فالعاصمة الاقتصادية. عندو التجربة باش يعوم مع هاد الحيتان المفترسة.
التعيين الثاني اللي كان فالمستوى هو تعيين وزير التعليم السابق ورئيس جامعة محمد الخامس السعيد امزازي واليا لجهة سوس ماسة. هادي اول مرة لرجل الدولة فالداخلية. مسارو كولو كان فالجامعة قبل ما يولي وزير. دوز مرحلتو مزيان فحكومة العثماني.
رجل حوار بامتياز. غادي يحرك هاد الجهة ويعطيها المكانة اللي تستحقها.
فهاد التعيينات كانت مكافئات كيف وقع مع فريد شوراق اللي ولى والي جهة مراكش اسفي. هاد الاقتصادي كان استاذ فالكلية ودوز المركز الجهوي للاستثمار بالجهة الشرقية وهو يولي عامل اقليم الرحامنة ف2010 وف2017 ولى عامل على الحسيمة. والي جهة مراكش السابق قسي لحلو ضعيف وفشل فتدبير مرحلة الزلزال وفشل يعطي الوهج للبهحة. غير شوراق كبيرة عليه مراكش. خداها غير مكافأة ليه حقاش كان فالرحامنة وبعد فالحسيمة. واش قاد بالمسؤولية؟ موحالش ولكن نتسناو ونشوفو
كاينة المكافأة فهاد التعيينات وكاين تعيينات غريبة. فجهة مهمة بحال طنجة تطوان الحسيمة جابو ليها سي حد اسمو يونس التازي. مهندس بلا تجربة كبيرة. خدم بزاف فالتجهيز. دوز عامل على عمالة تطوان وما طفروش. اليوم زادوه جهة كبيرة بزاف. باينة هادي دارها لفتيت عبد الوافي وزير الداخلية. باغي يجيب شي حد شخصيتو ضعيفة باش يتحكم فيه وصافي.
حتى تعيين علي خليل فجهة الداخلة وادي الذهب كبير عليه. قائد ورئيس قسم الشؤون الداخلية ورئيس دائرة ولى عامل فميدلت فالناظور ودابا والي جهة الداخلة اللي فيها مشاريع كثيرة. وبزاف. كاين بروفيلات احسن منو ما تسوقوش ليهم وجابو هادا.
الكسوة كبيرة عليه وغادي يبان هاد الشي باش يبدا الخدمة