مشكلة البولڤار هو انو كبر بزاف وامكانياتو مازال علي قد الحال وزهرهم انو ما مات حتى حد البارح. والي كازا مسؤول على لفضيحة وفرط وخاصو يكرط وادارة المهرجان عندها حتى هي مسؤولية

بيان البولڤار اليوم غير مقنع. البارح الجمعة 30 شتنبر 2022 فسهرة هاد المهرجان الخاص بالاشكال الموسيقية اللي نقدرو نقولو عليها شبابية٬ كان للراب. حضر "دولبيران" و"الموتشو" والكراني طوطو" و"لمورفين" و"ايگيدر". يعني حضرو لكبار ديال الراب تقريبا فالمغرب. حفلة بحال هادي لتيران "الريك" ديال الروكبي فبوسيجور المعروف بالراسينگ البيضاوي٬ كان خاصها تكون منظمة بشكل احترافي.
قبل ايام فالرباط كان حفل ل"كراندي طوطو" حضرو نفس العدد تقريبا شي 170 الف او اكثر وما وقع والو. حقاش كان تنظيم احترافي كبير فساحة مفتوحة وامنيا مقادة.
البولفار مع التطور اللي عرفو راه كبر. خاصو تنظيم كيساير هاد لكبورية. قبل ما نهدرو على هاد الشي نشوفو علاش قودوها. فالبيان قالو باللي نعتاذرو لكاع الناس اللي حضرو ساعات الجحيم وباللي التيران ما استوعبش العدد لكبير وعليه سدو البيبان مع الثمنية لعشية
واكدو باللي احداث الشغب اللي وقعات ما تشرف حتى حد.
اولا المهرجان مسؤول على هاد الاحداث. هو كيعرف جمهور هاد الفنانين اللي مبرمجين مزيان. حافظهم كاع. كيفاش ما فكروش ان الاقبال كان غادي يكون كبير بزاف. وعلاش خلاو سهرة بحال هادي فابور. الفابور فيه مشاكل كبيرة. كلشي يبغي يجي. هاداك اللي جاي من مدينة اخرى لهاد السهرة راه قادر يدفع من 50 حتى 300 درهم باش يشوف هاد الفنانة.
كان على الادارة تتحمل مسؤوليتها وتقول قودناها وسمحو لينا. ما غادينش نعاودوها. بلا ديك عبارة شي وحدين نقزو الحيط. طبعا ينقزوه لانهم جاو من بعيد لمهرجان وما قالوش ليهم اللا حگى غاديين يسدو باش يعمر التيران. هادي ما كايناش لا فدعوات لا فافيش لا والو.
عارف الامكانيات المادية للمهرجان ضعيفة بزاف. دابا البولفار كبر وميزانيتو مازال صغيرة. خاصهم حلول باش يدوزو كلشي يولي احترافي. يبدلو لبلاصة. العنق او سباتة او البرنوصي او نيفادا.... وتكون مفتوحة ماشي مسدودة باش يتفاداو اللي وقع البارح.
فهاد السياق لخلاص حل من الحلول. منها يغربلو ومنها يدورو شوية الحركة ويجيبو ناس كثر تخدم.
ماشي غير ادارة البولفار اللي مسؤولة. اللا حتى هاداك والي جهة الدار البيضا حميدوش مسؤول بشكل كبير ويمكن كثر من البولفار. هاد الوالي ما دارش الخدمة اللي خاصها دار. كيفاش سهرة بهاد النجوم ديال الراب وما عبأش على الاقل الاف من افراد القوات العمومية. راه مصالح الولاية كانت كتسنى هاد العدد.
كيفاش الوالي اليعقوبي قافز ووجد كلشي باش دازو سهرات داخلة فاطار انشطة الرباط عاصمة للثقافة الافريقية وحداه باقل من 100 كلمتر والي ما عارفش اش واقع فمدينتو. هاد الوالي خاصو يتحاسب. هو اصلا ما داير لهاد لمدينة والو
البارح وقعات معجزة باش ما طاحتش الارواح ولكن خاص الوالي يخلص حقاش فرط وبزاف