راه هادوك الفئات الهشة بزاف منهم كيصورو الفلوس ولكنهم خارج السيستيم وكيمشيو ليهم غير في البلية وغادي يشدو الدعم بينما الطبقة الوسطى غادا وكتنهار وتولي تحسد هادوك الطبقة الهشة على ود اعتناء الدولة بيهم

كاينة واحد الطبقة في المغرب محسوبة وسطى ولكن في الحقيقة فايتين الحزقة غير بالنقى وشوية دالفرونسي في بعض الحالات، واغلبيتهم موظفين بالصالير وهوما لي فين ماتكون شي ضريبة او اقتطاع او مساهمة ومعاونة كتسبق منهم هوما اللولين، واي حاجة زادو فيها في الثمن كيتقاسو هوما اللولين، محسوبين مرتاحين ولكن راه مول فراشة في راس المصلى كيدخل حسن منهم وزكريا الدوريجين الفلوس لي كتدوز في يديه في شهر خاصهم عام باش تدوز من يديهم وكثر، اييه عندهم ضمانات وكيتعطاهم الكريدي وحتى الفيزا، ولكن ماهوما قادرين يحرگو بيها يغامرو ربحة ولا ذبحة، حاصلين في الولاد والاسرة والكريدي ديال الدار والأمان الزائف لي كيقدمو صالير فقط يكفي باش ترجع للخدمة لغد ليه، ولكن مضمون وهادي اهم حاجة.
موشكيلة هاد الطبقة وانا منهم أنه كاين برجوازية في الاحياء الشعبية وفي دور الصفيح محسوبين معدمين وغادين يستافدو من الدعم المباشر، بينما هوما لا غادي يخلصو من جيبهم الحاجات لي غادي يتزادو في الثمن، وفي نفس الوقت غادي يشوفو أسر ديال البياعة والشراية والصناعية والمعلمية لي ساكنين في احياء هامشية ولكن ملك وقيمتها طالعة، راه دار غي حومة الشوك غير بالكرى تدخل 5000درهم في الشهر هي القليلة وتبقى ليك السكنى ، راه كيفرقوها بيوت وكيكريو للبنات دالمعامل بالعدد، بالاظافة الى بلاصة في السوق راه كتدخل الفلوس وهادشي كامل مكيدوزش حتى من حدا البنك، وفاش كتسول الواحد كيقوليك لعشا ماتعشيتوش البارح، ونهار كيتشد ليه شي ولد كتلقاه باغي يفاصل عليه بعشرة دالمليون غير ينقصو ليه الحكام، هادو غادي يستافدو من الدعم ومعلم مثلا غادي يستافد من تعويضات تصحيح الأوراق في المقابل غادي يتزاد عليه في كاع المواد الاستهلاكية.
واحد الفيديو في گود ديال وحدة من الملاح كتغوت ماباغاش التعويض ديال 2500 درهم وكتقول انها فقيرة ولكن غير بنتها كتصرف مية وخمسين درهم في النهار غير بلية والدري في الحبس خاصو القفة، عاد مصاريفها هي و ولاد بنتها والراجل راه غا هادشي لي حسبات فايت عشرالاف درهم ومعفرة على خمسين الف ريال وهي ساكنة غير في خربة في الملاح، باغا برطمة في كيليز كتعويض او بلاش، في المقابل المعلم الى تزادتو خمسين الف ريال في الصالير دقة وحدة راه غادي يولي يحس براسو هو اخنوش ولا بنحلون وغادي يكون ممتن للدولة مدى الحياة ويقدر كاع تستدعيه الداخلية يقمع المظاهرات قبالة البرلمان، راه هادوك الفئات الهشة بزاف منهم كيصورو الفلوس ولكنهم خارج النظام الاقتصادي وكيمشيو ليهم غير في البلية وغادي يشدو الدعم دابا بينما الطبقة الوسطى غادا وكتنهار وتولي تحسد هادوك المصنفين طبقة هشة على ود اعتناء الدولة بيهم.