غيلعب الرجاء الرياضي الماتش ديالو اليوم الاثنين مع الفتح الرياضي برسم الدورة 8 من البطولة الاحترافية بلا جمهور، بسبب عقوبة من العصبة الاحترافية لكرة القدم على الفريق الاخضر. الماتش بين الرجاء والفتح غيدخلو الفريق الأخضر فتيران مركب محمد الخامس بالدارالبيضاء بلا جمهور، فأول ويكلو للنسور هذا الموسم، وهذا العقوبة نزلت على الفريق بسبب "مقدوفات" استعملتها الجماهير الرجاوية فالماتش الماضي مع المغرب التطواني فدونور برسم الدورة 6. الويكلو كينقص بزاف من جمال كرة القدم، وهذا الشي اللي غيكون مصيرو ماتش الرجاء والفتح من غير اذا كان شي نيفو مزيان من لاعبين الفريقين وشي أهداف، وراه الأجواء ناقصة قبل انطلاق المباراة، حسب ما عاين موقع "كود" بالمحيط ديال التيران حيث البيبليك ما كاينش. الشوارع ديال الدارالبيضاء والزناقي ديال المعاريف اللي قريبة للتيران خاوية وفيها غير الناس عاديين كيدوزو، بحال إلى ما كاينش ماتش ديال الكرة وريحة المباراة ماكايناش، وهذا الشي قبل تقريبا ساعتين على الماتش اللي غيبدا مع 5 العشية، وهذا عكس الايام اللي كيكون فيها الجمهور سوا ملي كيكونو الرجاء لاعبين او الوداد، حيث كازا كتكون فيها الحيحة وأجواء استثنائية نهار الماتش الجماهير كتدير الفرجة قبل ما تبدا المباراة، وهذا الشي اللي كيميز كورة كازا على باقي مدن الفرق الاخرى. وكتعرف المباراة بين الرجاء الرياضي والفتح الرياضي واخا ملعوبة بلا جمهور، (كتعرف) استنفار أمني بمحيط ملعب المركب الرياضي محمد الخامس والشوارع اللي كتدي له، وكاين تواجد للباراجات ديال البوليس والقوات المساعدة، اللي خدامين على تأمين التيران باش يدوز الماتش فأحسن الظروف، واخا ما كاينش الجمهور ولكن التواجد ديالهم مهم تحسبا لأي طارئ.
