عبث. لجنة تحكيم الجائزة الكبرى للصحافة خاصها تعاود. ما يمكنش يكون رئيس بحال الهيثمي ما عندو علاقة بالصحافة يختار المقالات الفائزة

البارج الجمعة 15 دجنبر 2023 كان الاعلان على الجائزة الوطنية الكبرى للصحافة فدورتها 21 باوطيل سوفيتيل. ما بقاش مسرح محمد الخامس. دابا خاص لفلوس يتخسرو اكثر وخاص اوطيل.
ما غاديش نهدر لا علي شكون حضر ولا على اللي خدا تكريم او جوائز تكريمية ولا على واش يستاحق ولا اللا. دابا غادي نهدر على نقطة وحدة، كتعلق برئيس لجنة التحكيم. هادي فضيحة كبيرة ارتكبها وزير الشباب والتواصل والثقافة محمد مهدي بنسعيد. ما كيفهمش هاد الوزير فالصحافة وجاب واحد ما عندو علاقة بالصحافة واللي هو المسير لمجموعة "ماروك سوار" فادبيات الصحافيين هو مجرد "كوطابلي". اش لاحو يحكم على الصحافة وعلى المقالات الصحافية وعلى التحقيق وعلي الاجناس الصحافية الاخرى.
هادا جاي من البنك لقى راسو على رأس مجموعة اعلامية خاصة جدا فبلادنا. كيفهم فالبيسريات. فلحوانت. فالخضرة. فلحسابات. كلشي الا الصحافة.
"كود" سولات عدد من المسؤولين للي خدمو معاه فالسابق٬ كلهم كيهدرو باللي ما عندو علاقة بالصحافة. كيدير التسيير للمجموعة كيف كيسير حانوت او سوبيريت.
دابا هادا كيقول البارح باللي "المشاركات المتنافسة على جوائز الدورة" كانت غنية. ولكن ما قالش باش. اش كتفهم فالصحافة.
عليه خاص الغاء جوائز هاد العام ومحاسبة اللي ختارو. سولوه هو واش عمرو كتب شي مقال صحافي حتى ولى كيختار احسنهم هاد العام. هادي راها فضيحة وكبيرة. كانو معاه اعضاء حسن منو وبزاف. اش دخلو هو لهاد الشي